तेहरान/यरुशलम: पश्चिम एशिया एक बेर फेरि विनाशकारी संघर्षक कगार पर पहुँचि गेल अछि। ईरान द्वारा कएल गेल मिसाइल हमलाक जवाब में इजराइल सोमदिन भोर में ईरानक मध्य आ पश्चिमी क्षेत्रसभ पर जोरदार हवाई हमला कएलक। एहि जवाबी कार्रवाईक बाद पूरा क्षेत्र में तनाव चरम पर पहुँचि गेल अछि आ व्यापक क्षेत्रीय युद्धक आशंका बढ़ि गेल अछि।

तेहरान सहित कतेको शहर में सुनायल देल भीषण धमाका

ईरानक सरकारी टेलीविजनक अनुसार सोमदिन भोर में देशक कतेको महत्वपूर्ण शहर में लगातार जोरदार विस्फोटक आवाज सुनायल देल। राजधानी तेहरान, इस्फहान, करज आ तबरीज सहित अनेक शहर धमाकासँ दहलि उठल।

प्रत्यक्षदर्शीसभक अनुसार तेहरानक पश्चिमी क्षेत्र में कम-से-कम एकटा अत्यंत शक्तिशाली विस्फोट भेल, जाहिसँ स्थानीय लोकसभ में दहशत फैलि गेल।

नागरिक उड़ान लेल बंद कएल गेल हवाई क्षेत्र

इजरायली हवाई हमलाक बाद ईरानी प्रशासन तत्काल सुरक्षा उपाय करैत तेहरान स्थित इमाम खुमैनी अंतरराष्ट्रीय हवाई अड्डाक आसपासक पूरा हवाई क्षेत्र नागरिक विमान सेवाक लेल अस्थायी रूप सँ बंद कऽ देलक।

ईरानक अर्धसैनिक बल ‘रिवोल्यूशनरी गार्ड’ (IRGC) दावा कएलक जे इजराइल एहि हमलामे हवा सँ छोड़े जाएबला बैलिस्टिक मिसाइलक उपयोग कएने अछि। हालांकि, ईरानी अधिकारीसभ एखन धरि नुकसानक परिमाण अथवा निशाना बनाओल गेल सैन्य ठिकानासभक विस्तृत जानकारी सार्वजनिक नहि कएने छथि।

इजराइलक दावा – सैन्य ठिकानासभ केँ बनाओल गेल निशाना

हमलाक बाद इजराइल एकटा संक्षिप्त बयान जारी करैत कहलनि जे ओकर वायुसेना पश्चिमी आ मध्य ईरानक सैन्य ठिकानासभ पर कार्रवाई कएने अछि। हालांकि, इजराइल सेहो एखन धरि विस्तृत जानकारी नहि देलक अछि।

यमन सँ दागल गेल मिसाइल, हूती विद्रोही पर नजर

इजराइलक आपातकालीन सेवा सभक अनुसार एहि घटनामे कोनो प्रकारक जनहानि अथवा मिसाइल गिरबाक सूचना नहि भेटल अछि। एहि बीच यमन दिशासँ सेहो एकटा मिसाइल दागल जाएबाक खबरि सामने आएल अछि।

यमनक पैघ भाग पर ईरान समर्थित हूती विद्रोहिसभक नियंत्रण अछि। पूर्व में सेहो हूती विद्रोही इजराइल पर मिसाइल हमला करैत रहल छथि। हालांकि, वर्तमान ईरान-इजराइल संघर्ष में ओ सभ पूर्ण रूप सँ शामिल नहि भेल छथि। एखन धरि हूती संगठन एहि हमलाक जिम्मेदारी नहि लेने अछि।

सऊदी अरब में बजल चेतावनी सायरन

इजराइलक हमलाक कुछ देर बाद सऊदी अरबक अल-खार्ज प्रांत में मिसाइल खतरा संबंधी चेतावनी सायरन बजा देल गेल। एहि क्षेत्र में अमेरिका समर्थित महत्वपूर्ण प्रिंस सुल्तान एयर बेस स्थित अछि, जतय अमेरिकी सैनिक तैनात छथि।

सऊदी सरकारी मीडिया बाद में स्पष्ट कएलक जे संभावित मिसाइल खतराक स्थिति समाप्त भऽ गेल अछि। हालांकि, अधिकारीसभ एहि संबंध में कोनो विस्तृत जानकारी नहि देलनि।

अमेरिका की नजर स्थिति पर

हमलाक बाद अमेरिका स्थित व्हाइट हाउस सँ तत्काल कोनो आधिकारिक प्रतिक्रिया नहि आएल अछि। इजराइलक कार्रवाई आ अमेरिका संग संभावित समन्वयक विषय में पूछल गेल प्रश्नसभ पर सेहो व्हाइट हाउस टिप्पणी करब सँ परहेज कएलक।

विशेषज्ञसभक मानब अछि जे यदि ई तनाव लगातार बढ़ैत रहल तऽ पूरा पश्चिम एशिया एकटा व्यापक क्षेत्रीय संघर्षक चपेट में आबि सकैत अछि, जाहिसँ वैश्विक ऊर्जा बाजार आ अंतरराष्ट्रीय सुरक्षा व्यवस्था पर सेहो गंभीर प्रभाव पड़ि सकैत अछि।