नई दिल्ली। महाराष्ट्रमे शिवसेना (यूबीटी) आ पश्चिम बंगालमे तृणमूल कांग्रेसक भीतर चलि रहल राजनीतिक घमासानक बाद आब उत्तर प्रदेशक राजनीति सेहो गरमा गेल अछि। समाजवादी पार्टी (सपा)क भीतर संभावित टूटिक चर्चा तेज भऽ गेल अछि। एहि बीच उत्तर प्रदेश सरकारक कैबिनेट मंत्री ओम प्रकाश राजभरक नव बयान राजनीतिक गलियारामे हलचल पैदा कऽ देने अछि।
एक दिन पहिने समाजवादी पार्टीमे बड़का फूटिक भविष्यवाणी करबाक बाद राजभर बृहस्पतिदिन फेर दावा केलनि जे पार्टीक भीतर सांसदसभक एक मजबूत “बागी गुट” तैयार भऽ रहल अछि। ओ संकेत देलनि जे एहि गुटक नेतृत्व उत्तर प्रदेशक “बागी धरती” बलियाक एक नेता करताह।
सोशल मीडिया मंच ‘एक्स’ पर पोस्ट करैत राजभर लिखलनि, “काल्हिसँ लोक पूछि रहल छथि जे सपा मे की टूट होएत? तऽ सुनू, सपा केर बागी सांसदसभक गुटक अगुवाई उत्तर प्रदेशक ‘बागी धरती’क एक ‘लाल’ करत। काल्हि सपा कार्यालयमे सम्मेलनक नाम पर जेना ब्राह्मण समाजक कथित अपमान भेल, ताहिसँ ‘बागी बलिया’क ई ‘लाल’ बहुत आहत छथि। योजना पहिनेसँ बनल छल, मुदा काल्हिक घटना आगिमे घी डालबाक काज केलक। आब फूट निश्चित अछि।”
राजभरक बयानसँ ई स्पष्ट संकेत भेटैत अछि जे पार्टीक भीतर असंतोषक माहौल पहिनेसँ बनल छल, मुदा सपा कार्यालयमे ब्राह्मण समुदाय संग कथित व्यवहारक मुद्दा एहि प्रक्रिया केँ आरो गति देलक।
एहि बीच उत्तर प्रदेशक उपमुख्यमंत्री केशव प्रसाद मौर्य सेहो समाजवादी पार्टीक भीतर बढ़ैत असंतोषक चर्चा केलनि। कानपुरमे पत्रकारसभसँ बातचीत करैत मौर्य कहलनि जे भारतीय जनता पार्टी आगामी चुनावमे भारी बहुमतसँ सत्ता मे वापसी करत, जबकि समाजवादी पार्टी केँ फेर हारक सामना करए पड़त।
ओ दावा केलनि जे सपा केर अनेक नेता अखिलेश यादवसँ असंतुष्ट छथि आ पार्टीक लगभग 25-26 सांसद अलग गुट बनाबए अथवा पार्टी छोड़बाक योजना पर विचार कऽ रहल छथि।
राजभर आ मौर्यक लगातार बयानक बाद उत्तर प्रदेशक राजनीति मे अटकलक बाजार गरमा गेल अछि। हालांकि समाजवादी पार्टीक तरफसँ एहि दावा पर कोनो आधिकारिक प्रतिक्रिया नहि आयल अछि, मुदा राजनीतिक विश्लेषक मानैत छथि जे आगामी दिनमे सपा केर अंदरूनी स्थिति पर सभक नजरि बनल रहत।