नई दिल्ली: भारतीय जनता पार्टी (BJP) सोमदिन अपन नव राष्ट्रीय टीमक घोषणा कएने अछि। पार्टीक राष्ट्रीय अध्यक्ष नितिन नबीन द्वारा घोषित नव टीम मे कतेको वरिष्ठ नेता केँ महत्वपूर्ण संगठनात्मक जिम्मेदारी देल गेल अछि। पार्टीक 17 अगस्तक प्रेस विज्ञप्ति अनुसार, सभ नियुक्ति तत्काल प्रभाव सँ लागू भऽ गेल अछि।

नव टीम मे राजस्थानक पूर्व मुख्यमंत्री वसुंधरा राजे सिंधिया आ बीजेपीक पूर्व राष्ट्रीय महासचिव राम माधव केँ राष्ट्रीय उपाध्यक्ष नियुक्त कएल गेल अछि। ओतहि पूर्व केंद्रीय मंत्री स्मृति ईरानी केँ राष्ट्रीय महासचिवक जिम्मेदारी देल गेल अछि।

13 नेता बनलाह राष्ट्रीय उपाध्यक्ष

बीजेपी कुल 13 नेता केँ राष्ट्रीय उपाध्यक्ष नियुक्त कएने अछि। वसुंधरा राजे आ राम माधवक अतिरिक्त एहि सूची मे उत्तराखंडक पूर्व मुख्यमंत्री तीरथ सिंह रावत, बैजयंत जय पांडा, डी. पुरंदेश्वरी, रेखा वर्मा, वर्षाबेन नरेंद्रभाई दोशी, भारती प्रवीण पवार, मनप्रीत सिंह बादल, लाल सिंह आर्य, एम. नागराजा, तारिक मंसूर आ मधुचंद्र कर शामिल छथि।

स्मृति ईरानी समेत 8 राष्ट्रीय महासचिव

पार्टी 8 राष्ट्रीय महासचिवक नियुक्ति सेहो कएने अछि। एहि मे स्मृति ईरानीक संग विनोद तावड़े, सुनील बंसल, बिप्लब कुमार देब, सतीश पूनिया, गजेंद्र पटेल, हरीश द्विवेदी आ संजय भाटिया केँ जिम्मेदारी देल गेल अछि।

बीजेपीक संगठनात्मक सचिव बीएल संतोष राष्ट्रीय महासचिव (संगठन)क पद पर बनल रहताह। ओतहि शिवप्रकाश आ सौदान सिंह केँ राष्ट्रीय संयुक्त महासचिव (संगठन) नियुक्त कएल गेल अछि।

पीयूष गोयल केँ कोषाध्यक्षक जिम्मेदारी

पार्टी वित्तीय प्रबंधन सँ जुड़ल पद पर सेहो नियुक्ति कएने अछि। पीयूष गोयल केँ राष्ट्रीय कोषाध्यक्ष आ राजेश मंगल केँ राष्ट्रीय संयुक्त कोषाध्यक्ष नियुक्त कएल गेल अछि।

एकर अतिरिक्त बीजेपी संगठन आ आउटरीच विंग मे सेहो महत्वपूर्ण जिम्मेदारी तय कएने अछि। संबित पात्रा केँ नॉर्थ-ईस्ट कोऑर्डिनेटर आ तरुण चुघ केँ सेंट्रल ऑफिसक इंचार्ज बनाओल गेल अछि।

राष्ट्रीय संगठन केँ मजबूत करबाक प्रयास

बीजेपीक नव राष्ट्रीय टीम मे अनुभवी नेता सभक संग विभिन्न राज्य आ क्षेत्र केँ प्रतिनिधित्व देबाक प्रयास देखाइ पड़ैत अछि। वरिष्ठ नेता सभ केँ महत्वपूर्ण जिम्मेदारी देबाक संग पार्टीक राष्ट्रीय संगठन केँ मजबूत करब, विभिन्न क्षेत्र मे समन्वय बढ़ेब आ संगठनात्मक गतिविधि केँ प्रभावी ढंग सँ आगाँ बढ़ेब पर जोर देल गेल अछि।

नव टीमक घोषणा संग बीजेपी राष्ट्रीय स्तर पर अपन संगठनात्मक ढांचा केँ नव रूप देलक अछि। आब नव जिम्मेदारी पओनिहार नेता सभ पार्टीक संगठन विस्तार आ राजनीतिक गतिविधि केँ आगाँ बढ़ेब मे महत्वपूर्ण भूमिका निभौताह।