नई दिल्ली/कोलकाता। तृणमूल कांग्रेस (TMC) केर नाम आ चुनाव चिह्नकेँ लऽ कऽ चलि रहल विवाद आब चुनाव आयोग लग पहुँचि गेल अछि। भारत निर्वाचन आयोग (ECI) 17 सितंबरकेँ जारी अंतरिम आदेशमे दुनू प्रतिद्वंद्वी गुटकेँ फिलहाल ‘ऑल इंडिया तृणमूल कांग्रेस’ नाम आ पार्टीक आरक्षित ‘फूल आ घास’ (Flowers & Grass) चुनाव चिह्नक उपयोग करबासँ रोकि देलक अछि।
आगामी उपचुनावकेँ ध्यानमे रखैत आयोग दुनू पक्षसँ तीन-तीन वैकल्पिक नाम आ निर्वाचन आयोगक फ्री सिंबल सूचीसँ तीन-तीन चुनाव चिह्नक विकल्प मांगलक अछि। दुनू पक्षकेँ ई विकल्प 18 सितंबरकेँ पूर्वाह्न 11 बजेसँ पहिने देबाक छल। आयोग प्रत्येक गुटकेँ अलग-अलग नाम आ चुनाव चिह्न आवंटित करत।
अंतिम निर्णय एखन बाकी
निर्वाचन आयोगक अनुसार ई व्यवस्था फिलहाल अंतरिम अछि। पार्टीक नाम, संगठनात्मक नियंत्रण आ आरक्षित चुनाव चिह्नपर दुनू पक्षक दावाक अंतिम सुनवाई आ निर्णय एखन बाकी अछि। आयोग एहि विवादपर Election Symbols (Reservation and Allotment) Order, 1968 केर पैराग्राफ 15 केर तहत आगाँ निर्णय लेत।
आयोगक कहब अछि जे अंतरिम व्यवस्थाक उद्देश्य दुनू प्रतिद्वंद्वी समूहकेँ चुनावी प्रक्रियामे समान अवसर देब आ अंतिम निर्णय धरि हुनकर अधिकार आ हितक संरक्षण करब अछि।
6 अक्टूबरकेँ उपचुनाव
ई अंतरिम आदेश 6 अक्टूबर 2026 केँ होमयवला पश्चिम बंगालक नंदीग्राम आ रेजीनगर विधानसभा उपचुनावपर लागू होयत। दुनू गुट आब एहि चुनावमे मौजूदा TMC नाम आ आरक्षित चुनाव चिह्नक उपयोग नहि कऽ सकत।
‘फूल आ घास’ TMC केर आरक्षित चुनाव चिह्न रहल अछि आ निर्वाचन आयोगक मान्यता प्राप्त राजनीतिक दलक रिकॉर्डमे ई All India Trinamool Congress केर संग दर्ज अछि।
एहि बीच दुनू गुटक बीच पार्टीक नाम, संगठन आ चुनाव चिह्नपर अधिकारकेँ लऽ कऽ विवाद जारी अछि। आयोगक अंतिम निर्णयसँ पार्टीक आधिकारिक चुनावी पहचानकेँ लऽ कऽ आगाँक स्थिति स्पष्ट होयत।