नई दिल्ली। सरकारी सेवा केँ सुरक्षित आ आधुनिक तरीका सँ उपलब्ध कराबएबला वैश्विक तकनीकी सेवा कंपनी VFS Global आ WE Excel Software Pvt. Ltd. केर कंसोर्टियम केँ महाराष्ट्र सरकारक पंजीयन महानिरीक्षक एवं मुद्रांक नियंत्रक (IGR) विभाग सँ पाँच वर्षक महत्वपूर्ण अनुबंध भेटल अछि।
एहि अनुबंधक अंतर्गत राज्यमे संपत्ति पंजीकरण प्रक्रिया केँ बेसी तेज, पारदर्शी आ नागरिक-केंद्रित बनाबएबाक उद्देश्य सँ चरणबद्ध रूपमे 60 अत्याधुनिक ‘मॉडल सब-रजिस्ट्रार कार्यालय’ (SRO) स्थापित कएल जाएत।
कंसोर्टियम एहि कार्यालयसभक संपूर्ण स्थापना करत, जाहिमे अत्याधुनिक डिजिटल अवसंरचना, प्रशिक्षित कर्मीक नियुक्ति आ संपत्ति पंजीकरण सेवाक आधुनिकीकरण शामिल रहत।
ई नवका केंद्र तेज प्रक्रिया आ प्रभावी सेवा लेल डिजाइन कएल जाएत। सभ कार्यालय विशाल, आधुनिक आ पूर्णतः वातानुकूलित होएत। एतय आरामदायक प्रतीक्षालय, वाई-फाई सुविधा, निर्बाध डिजिटल प्रणाली, प्रशिक्षित सहायता कर्मी, अल्पाहार आ पेयजल जेकाँ सुविधा उपलब्ध रहत, जाहिसँ नागरिक अनुभव बेहतर बनत।
महाराष्ट्र सरकारक पंजीयन महानिरीक्षक रविंद्र बिनवडे कहलनि जे मॉडल कार्यालयक अवधारणा वर्तमान संपत्ति पंजीकरण प्रणालीमे मौजूद बाधा दूर करबाक रणनीतिक पहल अछि।
ओ कहलनि, “वर्षों सँ नागरिक लंबा कतार, भीड़भाड़ आ उचित वातावरणक अभाव जेकाँ समस्यासभ सँ जूझैत रहल छथि। एहि चुनौतीक समाधान लेल 60 समर्पित मॉडल सब-रजिस्ट्रार कार्यालय स्थापित कएल जा रहल अछि। ई कार्यालय पूर्णतः सरकारी नियंत्रणमे रहत आ विभागीय अधिकारीसभ द्वारा संचालित कएल जाएत।”
हुनका अनुसार, एहि मॉडलक मुख्य उद्देश्य पारंपरिक कार्यालयसभमे भीड़ कम करब आ नागरिक अनुभव बेहतर बनाबएब अछि। नागरिक सभ लेल ई सेवा वैकल्पिक रहत, अर्थात ओ मॉडल कार्यालय अथवा पारंपरिक SRO मे सँ कोनो एकटा चुनि सकत छथि।
VFS Global केर चीफ कमर्शियल ऑफिसर आ हेड–बिजनेस डेवलपमेंट जितेन व्यास कहलनि जे ई पहल प्रशासनिक सुधारक दिशामे महत्वपूर्ण कदम अछि।
ओ कहलनि, “तकनीक आ आधुनिक सेवा मॉडल केर माध्यम सँ महाराष्ट्रमे सरकारी सेवा केँ बेसी सुलभ, प्रभावी आ पारदर्शी बनाबएबाक दिशामे ई पैघ प्रगति अछि। ई अनुबंध भारतमे नागरिक सेवा क्षेत्रमे VFS Global लेल महत्वपूर्ण उपलब्धि अछि।”
हुनका अनुसार, ई परियोजना केवल संपत्ति पंजीकरणक आधुनिकीकरण नहि करत, बल्कि राज्यमे रोजगारक अवसर सेहो सृजित करत आ कुशल कार्यबल विकासमे योगदान देत।
VFS Global सरकारसभ संग मिलिकए दस्तावेज सत्यापन, एटेस्टेशन, शिक्षा, चिकित्सा परीक्षण आ नागरिक सेवा केंद्रक संचालनमे योगदान दैत रहल अछि।
कंपनी हालहि मे ब्राजीलस्थित डिजिटल नागरिक सेवा प्रदाता CiX Citizen Experience केर अधिग्रहण सेहो कएने अछि। एहि अधिग्रहणक उद्देश्य कृत्रिम बुद्धिमत्ता आ डेटा-आधारित प्लेटफॉर्मक माध्यम सँ सेवा परिवर्तनक गति तेज करब अछि।
वर्तमानमे VFS Global 10 देशमे 10 सरकारक लेल नागरिक सेवा प्रदान कऽ रहल अछि।