अहमदाबाद। भारतक सभसँ पैघ एकीकृत परिवहन आ लॉजिस्टिक्स कंपनी अडानी पोर्ट्स एंड स्पेशल इकोनॉमिक जोन लिमिटेड (APSEZ) अमेरिकी प्रौद्योगिकी कंपनी कैलेरिस (Kaleris) संग अपन रणनीतिक साझेदारीक विस्तारक घोषणा केने अछि। एहि पहलक मुख्य उद्देश्य कृत्रिम बुद्धिमत्ता (AI) आधारित अत्याधुनिक तकनीकक माध्यम सँ बंदरगाह आ लॉजिस्टिक्स नेटवर्कक दक्षता बढ़ेबाक संग संचालनकेँ बेसी स्मार्ट, स्वचालित आ प्रभावी बनेनाय अछि।
कंपनीक अनुसार, एहि बहुवर्षीय समझौता अंतर्गत कैलेरिस अपन एआई-सक्षम आ प्लग-एंड-प्ले ऑपरेटिंग प्लेटफॉर्मकेँ एपीएसईजेडक 9 घरेलू आ अंतरराष्ट्रीय बंदरगाहमे अवस्थित 15 कंटेनर टर्मिनलक संचालनमे लागू करत। ई परियोजना वर्ष 2030 धरि प्रतिवर्ष एक अरब टन कार्गो हैंडलिंग क्षमता हासिल करबाक कंपनीक महत्वाकांक्षी लक्ष्यक महत्वपूर्ण हिस्सा अछि।
एपीएसईजेड वर्ष 2031 धरि तकनीकी उन्नयन आ डीकार्बोनाइजेशन (कार्बन उत्सर्जनमे कमी) लेल लगभग 850 मिलियन अमेरिकी डॉलर निवेश करबाक योजना बनौने अछि। एहिमे सँ करीब 100 मिलियन अमेरिकी डॉलर दू चरणमे ऑटोमेशन आ ऑप्टिमाइजेशनकेँ गति देबाक लेल कैलेरिस संग साझेदारी पर खर्च कएल जाएत।
कंपनीक अनुमान अछि जे एहि तकनीकी सहयोगक माध्यम सँ वर्ष 2030 धरि लगभग 91 मिलियन मीट्रिक टन (एमएमटी) अतिरिक्त क्षमता विकसित कएल जा सकत, जे वर्तमान स्थापित क्षमताक लगभग 10 प्रतिशतक बराबर अछि।
एहि परियोजनाक तहत कैलेरिसक एडवांस्ड ऑप्टिमाइजेशन सिस्टम कंटेनर संचालनकेँ बेसी कुशल बनाएत। कंपनीक दावा अछि जे एकरा लागू केलासँ रबर टायर्ड गैन्ट्री (RTG) क्रेन केर उत्पादकतामे 20 प्रतिशत धरि आ टर्मिनल ट्रक केर उत्पादकतामे 14 प्रतिशत धरि सुधार संभव होएत। एकर परिणामस्वरूप कार्गो संचालनक गति बढ़त आ बंदरगाह पर जहाजक ठहराव समय घटत।
एपीएसईजेडक पूर्णकालिक निदेशक आ मुख्य कार्यकारी अधिकारी (CEO) अश्विनी गुप्ता कहलनि जे बंदरगाह आ लॉजिस्टिक्स क्षेत्रमे प्रतिस्पर्धात्मक बढ़त हासिल करबाक लेल एआई आधारित ऑटोमेशन अगिला महत्वपूर्ण कदम साबित होएत। हुनका अनुसार कंपनी पहिनेसँ ‘शोर-टू-डोर’ डिजिटल प्लेटफॉर्म संचालित क’ रहल अछि, जे ग्राहककेँ ट्रैक-एंड-ट्रेस आ एकीकृत कमांड एवं कंट्रोल जेकाँ सुविधा प्रदान करैत अछि। कैलेरिस संग एकीकरणसँ उत्पादकता आ टर्नअराउंड टाइममे आरो सुधार होएत।
ओतहि कैलेरिसक अध्यक्ष आ सीईओ किर्क नॉफ कहलनि जे एपीएसईजेड पैघ स्तर पर एआई-सक्षम पोर्ट नेटवर्कक वास्तविक प्रभाव देखाबि रहल अछि। हुनका अनुसार सभ 15 टर्मिनल धरि विस्तार एहि साझेदारीक सफलता आ दुनू कंपनीक बीच मजबूत विश्वासक प्रतीक अछि।
बढ़ैत कार्गो वॉल्यूम आ जटिल बनैत वैश्विक आपूर्ति श्रृंखलाकेँ ध्यानमे राखि एपीएसईजेड कृत्रिम बुद्धिमत्ता (AI), इंटरनेट ऑफ थिंग्स (IoT), कंप्यूटर विजन आ उन्नत ऑप्टिमाइजेशन तकनीकमे निवेश क’ रहल अछि। एहि तकनीकक माध्यम सँ वास्तविक समयक निगरानी, बेहतर संसाधन प्रबंधन आ तीव्र निर्णय लेबाक क्षमता विकसित कएल जाएत।
उल्लेखनीय अछि जे एपीएसईजेड विगत किछु वर्षमे अपन कार्गो हैंडलिंग क्षमता मे तेजी सँ विस्तार केने अछि। कंपनीकेँ पहिल 100 मिलियन मीट्रिक टन कार्गो हैंडलिंग क्षमताक स्तर धरि पहुँचय मे एक दशक सँ बेसी समय लागल छल, मुदा ओकर बादक सभ उपलब्धि कहीं बेसी तीव्र गति सँ हासिल कएल गेल। आइ कंपनीक नेटवर्क बंदरगाह, रेल, सड़क, ट्रकिंग, वेयरहाउस आ कार्गो गेटवेकेँ जोड़ैत देशक सभसँ पैघ एकीकृत परिवहन आ लॉजिस्टिक्स प्लेटफॉर्म बनि चुकल अछि।