ढाका। बांग्लादेशक पूर्व प्रधानमंत्री शेख हसीना शुक्रदिन घोषणा केलनि जे ओ आगामी दिसंबरक आसपास अवामी लीगक आन निर्वासित नेतासभक संग स्वेच्छासँ बांग्लादेश लौटए चाहैत छथि। 78 वर्षीय हसीना कहलनि जे स्वदेश लौटलाक बाद हुनका गिरफ्तारी अथवा हत्या धरि केर खतरा रहि सकैत अछि, मुदा एहि सबक बावजूद ओ अपन देश वापस जरूर जेताह।
गौरतलब अछि जे अगस्त 2024 मे छात्र नेतृत्व वाला आंदोलनक बाद शेख हसीना भारत आबि गेली छलथि। एहि आंदोलनक परिणामस्वरूप हुनकर सरकार सत्तासँ बाहर भ’ गेल छल। हसीना कहलनि जे बांग्लादेश लौटलाक बाद ओ अदालतक समक्ष आत्मसमर्पण करताह आ कानूनी प्रक्रिया केर सामना करताह।
ढाकासँ कोनो बातचीत नहि भेल अछि
शेख हसीना स्पष्ट कएलनि जे हुनकर वापसीक योजना केँ ल’ क’ ढाकामे वर्तमान सरकार अथवा प्रशासनक संग कोनो तरहक बातचीत नहि भेल अछि। ओ कहलनि, “हमरा लौटलापर गिरफ्तार कएल जा सकैत अछि, एतबे नहि, हमर हत्या सेहो भ’ सकैत अछि। मुदा तैयो हमरा अपन देश जरूर लौटए पड़त।”
पूर्व प्रधानमंत्री अपन राजनीतिक समर्थकसभक स्थिति पर गंभीर चिंता व्यक्त करैत कहलनि जे हुनकर दलक नेता आ कार्यकर्तासभ पर लगातार दमनात्मक कार्रवाई भ’ रहल अछि।
“यदि मृत्यु होए, तँ अपन मातृभूमि पर”
हसीना भावुक स्वरमे कहलनि, “यदि हमर मृत्यु लिखल अछि, तँ हम चाहब जे ओ हमर अपन माटिपर होए, जतय हमर माता-पिता सुपुर्द-ए-खाक छथि आ जतय हुनकर रक्त बहल छल।”
ओ कहलनि जे अपन देशक जनता आ समर्थकसभक बीच रहि क’ हर परिस्थिति केर सामना करब हुनकर संकल्प अछि।
अंतरराष्ट्रीय अपराध न्यायाधिकरणक फैसला
शेख हसीनाक ई बयान ओहि समय आयल अछि, जखन बांग्लादेशक अंतरराष्ट्रीय अपराध न्यायाधिकरण (आईसीटी) हुनका मानवताक विरुद्ध अपराधक मामला मे दोषी ठहरबैत मृत्युदंड सुनौने अछि। ई मामला वर्ष 2024 मे छात्र नेतृत्व वाला आंदोलनक दौरान भेल हिंसा आ प्रदर्शनकारीसभक मृत्युसँ जुड़ल अछि।
न्यायाधिकरणक अनुसार, आंदोलनक दौरान भेल मृत्युक लेल तत्कालीन सरकार जिम्मेदार छल। एहि फैसला मे पूर्व गृहमंत्री असदुज्जमान खान कमाल केँ सेहो मृत्युदंड देल गेल अछि, जखनकि तत्कालीन पुलिस महानिरीक्षक चौधरी अब्दुल्ला अल-मामून केँ पाँच वर्षक कारावासक सजा सुनाओल गेल अछि। एकर अतिरिक्त न्यायाधिकरण सरकार केँ शेख हसीना आ पूर्व गृहमंत्रीक संपत्ति जब्त करबाक निर्देश सेहो देने अछि।
एहि घटनाक्रमक बाद बांग्लादेशक राजनीतिक माहौल फेर गरमा गेल अछि आ शेख हसीनाक संभावित वापसी पर सबहक नजर टिकल अछि।