दिल्ली। लोक जनशक्ति पार्टी (रामविलास) संगठन मेँ प्रणव कुमार केँ महत्वपूर्ण जिम्मेदारी देने अछि। हुनका फेर सँ पार्टीक राष्ट्रीय मोर्चाक जिम्मेदारी देल गेल अछि। एहि संग हुनका दिल्ली प्रदेश अध्यक्ष आ राष्ट्रीय प्रवक्ताक दायित्व सेहो सौंपल गेल अछि। पार्टीक नेता आ कार्यकर्तासभ एहि निर्णयक स्वागत करैत प्रणव कुमार केँ बधाई आ शुभकामना देने छथि।
पार्टीक युवा राष्ट्रीय उपाध्यक्ष सह प्रवक्ता डॉ. विभय कुमार झा प्रणव कुमार केँ नव जिम्मेदारी भेटलापर हार्दिक बधाई देलनि आ पार्टीक केंद्रीय नेतृत्वक प्रति आभार व्यक्त केलनि। हुनकर कहब छल जे पार्टीक केंद्रीय अध्यक्ष आ केंद्रीय मंत्री चिराग पासवानक मार्गदर्शन तथा प्रणव कुमारक नेतृत्व मेँ पार्टी संगठन केँ मजबूत बनेबाक आ समाजहित मेँ निरंतर काज करबाक दिशा मेँ आगाँ बढ़ि रहल अछि।
डॉ. झा कहलनि जे प्रणव कुमार केँ दिल्ली प्रदेश अध्यक्षक संग राष्ट्रीय प्रवक्ताक जिम्मेदारी भेटब पार्टी लेल गौरवक विषय अछि। हुनका विश्वास अछि जे प्रणव कुमारक दीर्घ अनुभव, नेतृत्व क्षमता आ संगठनक प्रति समर्पण सँ पार्टी केँ नव मजबूती भेटत।
हुनकर कहब छल जे नव जिम्मेदारीक संग संगठनक विस्तार, कार्यकर्तासभ केँ सक्रिय करब आ जनसेवासँ जुड़ल काज केँ बेसी प्रभावी ढंग सँ आगाँ बढ़ेबामेँ सहायता भेटत। प्रणव कुमारक नेतृत्व मेँ पार्टी कार्यकर्तासभक बीच नव ऊर्जा आ उत्साहक संचार होयबाक सेहो उम्मीद अछि।
डॉ. विभय कुमार झा कहलनि जे पार्टी नेतृत्व प्रणव कुमारपर जे विश्वास व्यक्त केलक अछि, से हुनकर संगठनात्मक अनुभव आ समर्पणक प्रमाण अछि। हुनका विश्वास अछि जे प्रणव कुमार अपन दायित्वक पूरा निष्ठा आ प्रतिबद्धताक संग निर्वहन करैत पार्टी केँ मजबूत बनेबामेँ महत्वपूर्ण भूमिका निभौताह।
अंत मेँ डॉ. झा प्रणव कुमार केँ नव जिम्मेदारी लेल पुनः हार्दिक बधाई आ शुभकामना दैत हुनकर सफल, सार्थक आ उज्ज्वल कार्यकालक कामना केलनि।