ग्रामीण विकास, कृषि, सामाजिक कल्याण, खेल, कौशल विकास आ युवा सभसँ जुड़ल मुद्दा पर सचिवसभ संग व्यापक मंथन

नई दिल्ली। प्रधानमंत्री नरेंद्र मोदी बुधदिन अपन आधिकारिक आवास 7, लोक कल्याण मार्ग पर सचिवसभ संग एक उच्चस्तरीय बैठक केलनि। एहि बैठकमे **’विकसित भारत’**क लक्ष्य हासिल करबाक दिशा मे ग्रामीण विकास, कृषि, सामाजिक कल्याण आ आन प्रमुख क्षेत्रमे भेल प्रगतिक विस्तृत समीक्षा कएल गेल। संगहि प्रभावी क्रियान्वयन, मंत्रालयसभक बीच बेहतर समन्वय आ आगाँक कार्ययोजना पर विस्तारसँ विचार-विमर्श भेल।

बैठकक दौरान प्रधानमंत्री कहलनि जे सभटा सुधारक केंद्रमे नागरिकक कल्याण रहबाक चाही। हुनकर कहब छल जे लोकसभक वास्तविक जरूरत केँ ध्यानमे राखि कएल गेल सुधारसँ समाजमे सार्थक परिवर्तन अबैत अछि आ देश विकसित राष्ट्र बनेबाक दिशामे तेजीसँ आगाँ बढ़ैत अछि। हुनका अनुसार सुधारक उद्देश्य मात्र सरकारी व्यवस्था केँ बेहतर बनायब नहि, बल्कि आम नागरिकक जीवनमे सकारात्मक बदलाव आनब होयबाक चाही।

प्रधानमंत्री बदलैत वैश्विक आ राष्ट्रीय परिस्थिति केँ ध्यानमे रखैत सुशासन (गवर्नेंस) केँ बेसी सक्षम, लचील आ प्रभावी बनेबाक आवश्यकता पर जोर देलनि। हुनका मंत्रालय आ विभागसभ सँ उभरैत चुनौती आ आवश्यकताक समय पर पहचान कऽ भविष्यक अनुरूप तैयारी करबाक आग्रह केलनि।

हुनका ‘समग्र सरकार’ (Whole of Government) केर अवधारणा केँ विकसित भारतक सफलताक लेल अत्यंत आवश्यक बतौलनि। प्रधानमंत्री कहलनि जे सभ मंत्रालय आ विभाग साझा लक्ष्यक संग मिलि काज करथि। हुनकर कहब छल जे ‘विकसित भारत’ केवल सरकारी अभियान नहि, बल्कि एकटा जनआंदोलन बनबाक चाही, जाहिक सबसँ पैघ शक्ति देशक युवा वर्ग बनत।

नशामुक्त युवा आ बेहतर समन्वय पर जोर

प्रधानमंत्री युवासभमे बढ़ैत नशीला पदार्थक दुरुपयोग केँ गंभीर चुनौती बतबैत कहलनि जे एहि समस्यासँ निपटबाक लेल विभागसभक बीच बेहतर समन्वय आ संस्थागत व्यवस्था विकसित करब जरूरी अछि। हुनका अनुसार युवासभसँ जुड़ल योजनामे विभागसभक आपसी सहयोग बढ़लासँ बेहतर परिणाम भेटत।

भारत केँ वैश्विक खेल केंद्र बनेबाक लक्ष्य

बैठकमे खेल क्षेत्र पर सेहो विस्तारसँ चर्चा भेल। प्रधानमंत्री एकीकृत खेल विकास नीति अपनाबय पर जोर देलनि। हुनकर कहब छल जे खेल पर्यटन तेजीसँ उभरैत क्षेत्र अछि, तेँ भारत केँ पैघ अंतरराष्ट्रीय खेल आयोजनक मेजबानी लेल तैयार रहबाक चाही। संगहि खेल क्षेत्रमे स्टार्टअप, तकनीक आ नवाचार केँ प्रोत्साहन देबाक आवश्यकता पर सेहो बल देलनि।

कृषि आ कौशल विकास पर विशेष फोकस

प्रधानमंत्री कहलनि जे पीएम कुसुम योजना जेकाँ पहल केँ किसानसभ द्वारा व्यापक स्तर पर अपनाएल जाए तऽ कृषि क्षेत्रमे क्रांतिकारी परिवर्तन आबि सकैत अछि। हुनका कृषि क्षेत्रमे तकनीक आधारित सुधार केँ गति देबाक आवश्यकता पर जोर देलनि।

एहि संग प्रधानमंत्री भविष्यक वैश्विक आवश्यकता केँ ध्यानमे रखैत कौशल विकास पर विशेष बल देलनि। हुनकर कहब छल जे अंतरराष्ट्रीय अवसर आ बदलैत आर्थिक जरूरतक अनुरूप युवासभ केँ प्रशिक्षित करब विकसित भारतक निर्माणमे महत्वपूर्ण भूमिका निभाओत।

सचिवसभ अपन अनुभव आ सुझाव साझा केलनि

बैठकक दौरान विभिन्न मंत्रालयक सचिवसभ अपन-अपन क्षेत्रमे चलि रहल प्रमुख पहल, चुनौती आ सुधारसँ जुड़ल अनुभव आ सुझाव साझा केलनि। प्रधानमंत्री सेहो भविष्यक कार्ययोजना लेल अपन दृष्टिकोण आ सुझाव रखलनि। बैठकमे प्रभावी क्रियान्वयन, बेहतर समन्वय आ **’विकसित भारत’**क लक्ष्य दिशामे तेज प्रगति सुनिश्चित करबाक विषय पर व्यापक विचार-विमर्श भेल।

बैठकमे कैबिनेट सचिव, विभिन्न प्रमुख मंत्रालयक सचिव आ प्रधानमंत्री कार्यालयक वरिष्ठ अधिकारी उपस्थित छलथि।