मुंबई। अदाणी एयरपोर्ट होल्डिंग्स लिमिटेड (एएएचएल) केँ वैश्विक स्तर पर एकटा महत्वपूर्ण उपलब्धि हासिल भेल अछि। कंपनीक दू प्रमुख हवाईअड्डा— नवी मुंबई अंतरराष्ट्रीय हवाईअड्डा (एनएमआईए) आ लोकप्रिय गोपीनाथ बोरदोलोई अंतरराष्ट्रीय हवाईअड्डा, गुवाहाटीक टर्मिनल-2 केँ प्रतिष्ठित प्रिक्स वर्साय 2026 द्वारा जारी “विश्वक सबसँ सुंदर हवाईअड्डा” सूचीमे स्थान देल गेल अछि।
ई सम्मान एएएचएलक अत्याधुनिक डिजाइन, सतत विकास (सस्टेनेबिलिटी) आ यात्री-केंद्रित नवाचारक प्रति प्रतिबद्धताक वैश्विक मान्यता मानल जा रहल अछि। दुनियाभरमे अगिला पीढ़ीक विमानन आधारभूत संरचना विकसित करबाक दिशामे कंपनीक बढ़ैत प्रभाव सेहो एहि उपलब्धिसँ उजागर भेल अछि।
प्रिक्स वर्साय वास्तुकला आ डिजाइनक क्षेत्रक एक प्रतिष्ठित वैश्विक पुरस्कार अछि, जे 2015 सँ पेरिस स्थित यूनेस्को मुख्यालयमे प्रतिवर्ष प्रदान कयल जाइत अछि। एहि पुरस्कारक माध्यमसँ ओहि नव निर्मित हवाईअड्डा आ टर्मिनलसभ केँ सम्मानित कयल जाइत अछि, जे आधुनिक वास्तुकला, नवाचार आ सांस्कृतिक पहचानक उत्कृष्ट समन्वय प्रस्तुत करैत अछि।
नवी मुंबई अंतरराष्ट्रीय हवाईअड्डाक टर्मिनल-1 केँ कमल फूल सँ प्रेरित अनूठ डिजाइन, भविष्यवादी वास्तुकला तथा तकनीक, कला आ कार्यक्षमताक उत्कृष्ट मेलक लेल सराहल गेल अछि। विशेषज्ञक अनुसार ई हवाईअड्डा आधुनिक भारतक वैश्विक आकांक्षाक प्रतीक बनिकय उभरि रहल अछि।
दोसर दिस, गुवाहाटीक लोकप्रिय गोपीनाथ बोरदोलोई अंतरराष्ट्रीय हवाईअड्डाक टर्मिनल-2 केँ क्षेत्रक समृद्ध जैव विविधताक प्रतीक ‘बैंबू ऑर्किड’ (बाँस ऑर्किड) सँ प्रेरित डिजाइनक लेल मान्यता भेटल अछि। एकर वास्तुशिल्पीय अवधारणा प्राकृतिक सौंदर्य, पर्यावरणीय संतुलन आ कार्यक्षम संरचनाक उत्कृष्ट उदाहरण मानल जा रहल अछि।
प्रिक्स वर्साय 2026 क सूचीमे भारतक अलावा ग्वांगझू (चीन), फ्रैंकफर्ट (जर्मनी), कंडाल स्टुएंग (कंबोडिया), पिट्सबर्ग (संयुक्त राज्य अमेरिका) आ सैन डिएगो (संयुक्त राज्य अमेरिका) केर हवाईअड्डासभ सेहो शामिल छथि।
पुरस्कारक आयोजकसभक अनुसार प्रिक्स वर्सायक उद्देश्य एहन बुद्धिमत्तापूर्ण आ टिकाऊ विकास केँ प्रोत्साहित करब अछि, जतय संस्कृति आ पर्यावरण एक-दोसरक पूरक बनिकय मानव जीवन केँ समृद्ध करैत अछि।
वर्ष 2026 केर एहि सूचीमे चयनित हवाईअड्डासभमे सँ वर्षक अंतमे तीनटा हवाईअड्डा अथवा टर्मिनल केँ विश्व खिताब (प्रिक्स वर्साय, इंटीरियर अथवा एक्सटीरियर) सेहो प्रदान कयल जाएत।
एएएचएलक एहि उपलब्धि सँ भारतीय विमानन क्षेत्र केँ अंतरराष्ट्रीय स्तर पर नव पहचान भेटल अछि आ देशक आधुनिक हवाईअड्डा विकासक दिशा मे एकटा महत्वपूर्ण उपलब्धि मानल जा रहल अछि।