दिल्ली। प्रतिष्ठित दिल्ली ओपन टैलेंट सर्च स्विमिंग प्रतियोगिता 2026 केर भव्य समापन डॉ. एसपीएम स्विमिंग पूल परिसर मे भेल। विश्वस्तरीय तैराकीक ऊर्जा, रोमांच आ खेलक प्रति उत्साह सँ भरल एहि आयोजन दिल्लीके गति, सहनशीलता आ खेल-जुनूनक जीवंत केंद्र बना देलक।
भारतक सबसँ पैघ एक-दिवसीय तैराकी चैंपियनशिपक रूप मे अपन प्रतिष्ठा पुनः स्थापित करैत एहि प्रतियोगितामे 9 भारतीय राज्य आ 3 अंतरराष्ट्रीय देशक 300 प्रमुख संस्थानक 700 सँ बेसी तैराक भाग लेलनि। प्रतियोगितामे कुल 1200 प्रविष्टि रहल। आयोजनक दौरान एके दिनमे लगातार 184 रोमांचक रेसमे 120 स्पर्धा सुचारू रूप सँ आयोजित कयल गेल।
‘सभ लेल खेल’क अपन मूल भावना अनुरूप प्रतियोगितामे विभिन्न आयुवर्गक प्रतिभागी शामिल भेलाह। 4 वर्षक नन्हा प्रतिभाशाली बच्चा सँ लऽ कऽ 82 वर्षक अनुभवी मास्टर तैराक धरि सभ एकहि मंच पर अपन प्रतिभा देखौलनि। ई प्रतियोगिता एहि बातक प्रमाण रहल जे पानी आ तैराकीक प्रति जुनूनक कोनो उम्र नहि होइत अछि।
सुबहक कार्यक्रमक उद्घाटन श्री मोहिंदर सिंह, पूर्व डीआईजी, सीआरपीएफ द्वारा कयल गेल। समापन समारोहक अध्यक्षता डॉ. सुप्रतीक गुप्ता, प्रोफेसर, आईआईटी दिल्ली द्वारा कयल गेल। एहि अवसर पर ओपन-वॉटर तैराकीक दिग्गज डॉ. मीनाक्षी पाहुजा, डॉ. एसपीएम कॉम्प्लेक्सक प्रशासक श्री दिलीप, पूर्व प्रशासक श्री संजय बिष्ट आ श्री हरीश टोकस सहित खेल जगतक अनेक प्रतिष्ठित व्यक्तित्व उपस्थित छलाह।
चैंपियनशिपक नेतृत्व पूर्व अंतरराष्ट्रीय तैराक श्री राजा राम टोकसक दूरदर्शी मार्गदर्शनमे भेल।
आयोजनक राष्ट्रीय महत्व पर प्रकाश दैत आयोजन सचिव डॉ. जितेंद्र टोकस कहलनि, “भारतीय तैराकीमे ई एकटा अनूठ पहल अछि, जतय उम्र कोनो बाधा नहि अछि। पहली बेर प्रतिस्पर्धात्मक पानीमे उतरनिहार नन्हा बच्चा सँ लऽ कऽ अपन सीमा केँ चुनौती देनिहार अनुभवी मास्टर तैराक धरि प्रत्येक एथलीट केँ समान महत्व देल जाइत अछि। एहि एकजुट ऊर्जासँ हमर विरासत परिभाषित होइत अछि।”
चैंपियनशिपक भव्य आयोजन केँ पॉलिसी बाजार, सुप्रैटिक ट्रस्ट, ईएससी मेडिकैम्स, वेंडिहाल्ट आ एए सहित प्रमुख कॉरपोरेट आ संस्थागत साझेदारक सहयोग प्राप्त भेल।
दिल्ली ओपन टैलेंट सर्च स्विमिंग प्रतियोगिता 2026 भारतीय एक्वेटिक्सक क्षेत्रमे नव मानदंड स्थापित कऽ रहल अछि। आयोजन समितिए राष्ट्रीय स्तर पर तैराकी केँ प्रमुखता देबाक लेल मीडिया आ सभ सहयोगीक प्रति आभार व्यक्त कयलक।