नई दिल्ली। वैदिक मंत्रोच्चार, ध्वजारोहण आ हजारों श्रद्धालु सभक उत्साहपूर्ण सहभागिता बीच शनिदिन इंदिरा गांधी इंडोर स्टेडियम में अखिल विश्व गायत्री परिवारक तीन दिवसीय जन्मशताब्दी महोत्सवक भव्य शुभारंभ भेल। समारोह में 20 हजारसँ बेसी लोक सहभागिता कयलनि। लोकसभा अध्यक्ष ओम बिरला आ केंद्रीय संचार मंत्री ज्योतिरादित्य सिंधिया एहि अवसर पर संस्कार, नारी सम्मान, भारतीय संस्कृति आ राष्ट्र निर्माणक संदेश देलनि।
समारोहक दलनायक आ देव संस्कृति विश्वविद्यालयक उपाध्यक्ष डॉ. चिन्मय पण्ड्या तथा दिल्ली सरकारक मंत्री कपिल मिश्रा संयुक्त रूपसँ ध्वजारोहण कय महोत्सवक विधिवत शुभारंभ कयलनि। एहि दौरान शांतिकुंजक आचार्य सभ वैदिक मंत्रोच्चार कयलनि।
व्यक्ति निर्माणसँ राष्ट्र निर्माण धरि गायत्री परिवारक भूमिका
समारोहक दोसर सत्र में लोकसभा अध्यक्ष ओम बिरला कहलनि जे गायत्री परिवार व्यक्ति निर्माण, परिवार निर्माण आ राष्ट्र निर्माणक माध्यमसँ समाज में नव चेतना जगाबय के काज क’ रहल अछि। अखंड दीपक शताब्दी जन-जन तक ज्ञान, संस्कार आ सकारात्मक विचारक प्रकाश पहुंचाबय के अवसर अछि।
केंद्रीय संचार मंत्री ज्योतिरादित्य सिंधिया उपस्थित जनसमुदाय केँ मातृत्व आ भाईचाराक विस्तार, नारी सम्मान तथा भारतीय संस्कृतिक संरक्षणक संग नव पीढ़ी में आध्यात्मिक चेतना जगाबय के तीनटा संकल्प करौलनि। एहि अवसर पर ओ वंदनीया माताजी के जन्मशताब्दीक स्मृति में विशेष डाक टिकट जारी कयलनि।
ई डाक टिकट अखिल विश्व गायत्री परिवारक सौ वर्षक साधना, तप, सेवा, संगठन आ लोकमंगल लेल कयल गेल रचनात्मक प्रयासक राष्ट्रीय स्तर पर स्मरण करबैत अछि। उल्लेखनीय अछि जे एहि सँ पहिने वर्ष 1991 में युगऋषि पं. श्रीराम शर्मा आचार्यक नाम पर आ वर्ष 2021 में शांतिकुंजक स्थापना के स्वर्ण जयंती पर डाक टिकट जारी कयल गेल छल। माताजी के स्मृति में जारी ई तेसर डाक टिकट अछि।
डॉ. चिन्मय पण्ड्या कहलनि ऐतिहासिक त्रिवेणी संगम
महोत्सवक दलनायक डॉ. चिन्मय पण्ड्या कहलनि जे ई आयोजन वंदनीया माताजी के जन्मशताब्दी, युगऋषि पं. श्रीराम शर्मा आचार्यक तप-साधना आ अखंड दीपक सौ वर्षक ऐतिहासिक त्रिवेणी संगम अछि। ओ कहलनि जे लोकमंगल आ समाजक कल्याण लेल राजतंत्रक व्यवस्था शक्ति आ धर्मतंत्रक नैतिक चेतनाक समन्वय आवश्यक अछि।
समारोह में देव संस्कृति विश्वविद्यालयक लगभग 650 विद्यार्थी विभिन्न व्यवस्था में अपन सेवा द’ रहल छथि। प्रज्ञा योग आ लोकनृत्यक आकर्षक प्रस्तुति भारतीय संस्कृतिक विविधता आ आध्यात्मिक परंपरा केँ जीवंत क’ देलक।
दू नवंबर धरि चलत महोत्सव
हरिद्वारक बाद दिल्ली में आयोजित जन्मशताब्दी महोत्सवक एहि दोसर चरण में व्यक्ति निर्माण, परिवार निर्माण आ राष्ट्र निर्माणक संकल्पक समीक्षा कयल जा रहल अछि। दू नवंबर धरि चलयवला ई आयोजन नारी जागरण, विश्व बंधुत्व आ युग निर्माणक संदेश के समर्पित अछि।
समारोहक पहिल दिन केंद्रीय कैबिनेट मंत्री डॉ. मनसुख मांडविया, दिल्ली सरकारक कैबिनेट मंत्री कपिल मिश्रा, महाराष्ट्र सरकारक कैबिनेट मंत्री सुधीर मुनगंटीवार सहित विभिन्न राज्यक अनेक गणमान्य व्यक्ति आ श्रद्धालु उपस्थित छलाह।