नई दिल्ली। यूनिसेफ यूवा (UNICEF YuWaah) केर वार्षिक प्रमुख कार्यक्रम ‘यूथ सेंट्रल’ मे 100 सँ बेसी हितधारक एकठाम जुटलाह। एहि आयोजनमे सरकार, निजी क्षेत्र, फाउंडेशन, नागरिक समाज आ युवा प्रतिनिधि सभ भाग लेलनि। कार्यक्रमक दौरान युवा विकास सँ जुड़ल महत्वपूर्ण मुद्दा पर विस्तार सँ चर्चा भेल।
कार्यक्रममे युवा-केंद्रितता, महिलाक लेल आर्थिक अवसर, आर्टिफिशियल इंटेलिजेंस (AI) आ उद्यमिता, इंटर्नशिप, दिव्यांग समावेशन आ सेवा-आधारित शिक्षण सन विषय प्रमुख रहल।
कार्यक्रममे युवा कार्य मंत्रालयक अतिरिक्त सचिव नितेश कुमार मिश्रा, जेनरेशन अनलिमिटेडक कार्यवाहक सीईओ डॉ. नाडी अल्बिनो, SAP केर चीफ इन्क्लूजन एंड सोशल इम्पैक्ट ऑफिसर रश्मि वर्मा, यूनिसेफ इंडिया केर डिप्टी रिप्रेजेंटेटिव जेस्पर मोलर, UNFPA केर कुमार मनीष आ यूनिसेफ यूवा केर युवा प्रतिनिधि पूजा महलदार उपस्थित छलाह।
युवा सभके निर्णय प्रक्रिया मे बराबरक स्थान देबाक आह्वान
यूनिसेफ इंडिया केर डिप्टी रिप्रेजेंटेटिव जेस्पर मोलर कहलनि जे यूथ सेंट्रल सन आयोजनक माध्यम सँ विभिन्न क्षेत्रक बीच सहयोगक शक्ति सामने अबैत अछि।
ओ कहलनि जे एहि कार्यक्रममे 100 सँ बेसी सरकारी, निजी क्षेत्र आ युवा साझेदार एकठाम आबि बच्चा आ युवा सँ जुड़ल महत्वपूर्ण मुद्दा पर संवाद कएलनि। हुनकर अनुसार, यूथ सेंट्रलमे युवा सभ बातचीतक केंद्रमे छथि आ सरकार, निजी क्षेत्र आ नागरिक समाजक नेतृत्वकर्ता सभक संग युवा प्रतिनिधि सभके सेहो निर्णय प्रक्रियामे बराबरीक स्थान देल गेल अछि।
‘द रोड टू यूटोपिया’ फ्रेमवर्कक भेल लॉन्च
कार्यक्रमक दौरान UNICEF YuWaah आ SAP India संयुक्त रूप सँ ‘The Road to Yutopia: Youth Centrality at Workplaces Framework’ लॉन्च कएलनि।
ई एकटा व्यावहारिक मार्गदर्शिका अछि, जे कंपनियो सभके युवा-अनुकूल, समावेशी आ भविष्य लेल तैयार कार्यस्थल बनेबाक दिशा मे मदद करबाक उद्देश्य सँ तैयार कएल गेल अछि।
फ्रेमवर्क विशेष रूप सँ युवा कर्मचारी आ शुरुआती करियरक प्रोफेशनल सभक दृष्टिकोण आ अनुभवके कार्यस्थलक विभिन्न व्यवस्था मे शामिल करबाक रोडमैप प्रस्तुत करैत अछि। एहि मे भर्ती, कार्यस्थल संस्कृति, गवर्नेंस, सहयोग आ नवाचार सन क्षेत्र शामिल अछि।
युवा सभके कर्मचारी नहि, भागीदार बनेबाक सोच
जेनरेशन अनलिमिटेडक कार्यवाहक सीईओ डॉ. नाडी अल्बिनो कहलनि जे युवा सभ ऊर्जा, महत्वाकांक्षा आ नव विचारक संग रोज कार्यस्थल पर अबैत छथि, मुदा बहुतो कार्यस्थल एखन धरि युवा सभक विचारके सही ढंग सँ सुनबाक आ हुनका पर भरोसा करबाक लेल तैयार नहि अछि।
ओ कहलनि जे ‘द रोड टू यूटोपिया’ व्यवसाय सभके एकटा व्यावहारिक शुरुआत उपलब्ध करबैत अछि, जाहि सँ कंपनी भर्ती, मेंटरिंग, संवाद, सहयोग आ निर्णय प्रक्रियामे युवा-केंद्रित दृष्टिकोण अपनाबि सकय।
हुनकर अनुसार, युवा सभके वास्तविक योगदान देबाक अवसर देल जाए तँ ओ पुरान कार्यशैलीके चुनौती दऽ सकैत छथि, समस्या सभके सामने अनैत छथि आ नव समाधानक रास्ता खोलि सकैत छथि।
युवा-केंद्रित कार्यस्थलक परिकल्पना
ई फ्रेमवर्क Yutopia नामक सार्वजनिक, निजी क्षेत्र आ युवा साझेदारी पर आधारित पहल सँ विकसित कएल गेल अछि। एकर संयुक्त नेतृत्व UNICEF YuWaah आ SAP India द्वारा कएल जा रहल अछि।
Yutopia केर उद्देश्य एहन भविष्यक कल्पना करब अछि जतय युवा सभ केवल कर्मचारी अथवा सहभागी नहि, बल्कि भागीदार, सह-निर्माता आ नेतृत्वकर्ताक भूमिका मे सेहो रहथि।
SAP Labs India केर एमडी आ Indo-German Chamber of Commerce केर अध्यक्ष सिंधु गंगाधरन कहलनि जे युवा सभके सही कौशल, समर्थन प्रणाली आ निर्णय प्रक्रियामे वास्तविक स्थान भेटला पर ओ नवाचार, समावेशन आ विकासक मजबूत माध्यम बनि सकैत छथि।
ओ कहलनि जे UNICEF YuWaah संग जारी साझेदारीक माध्यम सँ SAP एहन कार्यस्थल तैयार करबाक लेल प्रतिबद्ध अछि, जतय प्रत्येक युवा अपन क्षमता अनुसार विकास कऽ सकय आ सार्थक योगदान दऽ सकय।
युवा प्रतिभा सँ संगठनके बदलबाक जरूरत
SAP केर चीफ इन्क्लूजन एंड सोशल इम्पैक्ट ऑफिसर रश्मि वर्मा कहलनि जे युवा सभ कार्यस्थल पर नव सोच, ऊर्जा आ उद्देश्यक स्पष्ट भावना लऽ कऽ अबैत छथि।
हुनकर अनुसार, जखन संगठन युवा सभके केवल अपन बात कहबाक अवसर नहि, बल्कि निर्णय प्रक्रियामे वास्तविक स्थान दैत अछि, तखन युवा सभ संगठनके तेजी सँ नवाचार करबा, अलग ढंग सँ सोचबा आ व्यापार तथा समाज लेल सकारात्मक प्रभाव पैदा करबा लेल प्रेरित करैत छथि।
ओ कहलनि जे SAP केर लक्ष्य केवल युवा प्रतिभाके शामिल करब नहि, बल्कि युवा सभक विचार सँ संगठनके आकार देबाक दिशा मे आगाँ बढ़ब अछि।
‘द रोड टू यूटोपिया’ फ्रेमवर्कक माध्यम सँ युवा सभके कार्यस्थलक केंद्रमे राखबाक आ हुनकर विचार, कौशल आ नेतृत्व क्षमताके उपयोग करबाक दिशा मे महत्वपूर्ण पहल शुरू भेल अछि। ई पहल भविष्यक कार्यस्थलके बेसी समावेशी, सहयोगात्मक आ युवा-केंद्रित बनेबाक प्रयासके मजबूत कऽ सकैत अछि।