देवघर। श्रावण मासक पहिल सोमवारीक अवसर पर झारखंडक विश्वप्रसिद्ध बाबा बैद्यनाथ धाम मे श्रद्धालुसभक भारी भीड़ उमड़ि पड़ल। भोरहिसँ देशक विभिन्न भागसँ पहुंचल कांवरिया आ श्रद्धालुसभ “बोल बम” आ “हर-हर महादेव” केर जयघोषक बीच बाबा भोलेनाथक जलाभिषेक कयलनि। मंदिर प्रशासनक अनुमान अछि जे आइ लगभग ढाई लाख सँ बेसी श्रद्धालु बाबा पर जल अर्पित करताह।
देवघरक अनुमंडल पदाधिकारी (एसडीओ) आ मंदिर प्रभारी रवि कुमार कहलनि जे रविदिन करीब डेढ़ लाख श्रद्धालु बाबा बैद्यनाथक दर्शन आ जलार्पण कयने छलाह। पहिल सोमवारी पर एहि संख्या मे उल्लेखनीय वृद्धि होयबाक संभावना अछि।
रवि कुमार बतौलनि जे विगत वर्षसभक अनुभवक आधार पर एहि बेर श्रद्धालुसभक सुविधा लेल विशेष व्यवस्था कएल गेल अछि। मंदिर परिसर मे बाहरी ‘अर्घा’ (जल चढ़ेबाक व्यवस्था) क आकार बढ़ा कऽ सात फीट सँ बेसी कएल गेल अछि, जाहिसँ जे श्रद्धालु गर्भगृहक लंब कतार मे नहि ठाढ़ भऽ सकैत छथि, ओहो सहज रूपसँ भगवान शिव पर जल चढ़ा सकथि।
ओ कहलनि जे पार्वती मंदिरक बाहर सेहो एकटा पैघ बाहरी अर्घा बनाओल गेल अछि, जाहिसँ ओतय आबयवला श्रद्धालुसभकेँ बिना असुविधाक जल अर्पित करबाक सुविधा भेटत।
भीड़ प्रबंधन लेल प्रशासन व्यापक तैयारी कएने अछि। मंदिर परिसरक भीतर आ बाहर विस्तार योग्य बैरिकेडिंग लगाओल गेल अछि, जाहिसँ श्रद्धालुसभक आवाजाही व्यवस्थित रहय। एकर अतिरिक्त मंदिरक आसपासक अस्थायी दोकानसभ हटा देल गेल अछि, जाहिसँ श्रद्धालु आसानीसँ उमा भवन आ पार्वती मंदिर धरि पहुंचि सकथि।
एसडीओ रवि कुमारक अनुसार, पूरा शहर मे भीड़ नियंत्रण लेल अतिरिक्त बैरिकेडिंग लगाओल गेल अछि आ पर्याप्त संख्या मे पुलिस बल तैनात कएल गेल अछि। सुरक्षा, यातायात आ श्रद्धालुसभक सुविधा पर प्रशासन लगातार नजरि रखने अछि।
श्रावण मास मे बाबा बैद्यनाथ धाम देशक प्रमुख शिवधामसभ मे सँ एक मानल जाइत अछि। एहि दौरान लाखों कांवरिया सुल्तानगंज सँ गंगाजल आनिकऽ लगभग 105 किलोमीटर पैदल यात्रा कऽ देवघर पहुंचैत छथि आ बाबा बैद्यनाथ पर जलाभिषेक कऽ अपन मनोकामना पूर्ण होबाक प्रार्थना करैत छथि। श्रावणक पहिल सोमवारी पर उमड़ल श्रद्धाक ई सैलाब एक बेर फेर बाबा धाम मे भक्ति, आस्था आ आध्यात्मिक उत्साहक अद्भुत वातावरणक साक्षी बनल।