पटना: बांकीपुर विधानसभा उपचुनावमे जन सुराजक उम्मीदवार प्रशांत किशोरक बढ़त आ जीतक रुझान सामने अबिते हुनकर समर्थकसभमे जश्नक माहौल बनि गेल अछि। पार्टीक कार्यकर्ता आ समर्थक एक-दोसराक मिठाइ खुआकऽ जीतक खुशी मना रहल छथि।
प्रशांत किशोरक टीमक सक्रिय सदस्य अनूप मैथिल आ आदित्य मोहन सेहो जीतक जश्नमे शामिल छथि। एहि दुनू युवा 2025 केर विधानसभा चुनाव समाप्त भेलाक बाद जन सुराजसँ जुड़ल छलाह। गेल तीन माससँ ई दुनू बांकीपुरक गली-गलीमे घूमि कऽ जनसंपर्क अभियान चलबैत रहलाह आ युवासभमे उत्साह जगबैत रहलाह।
अनूप मैथिल आ आदित्य मोहन पूर्वमे मिथिला स्टूडेंट यूनियन (एमएसयू) सँ सेहो लम्बा समय धरि जुड़ल रहल छथि। छात्र राजनीति आ सामाजिक गतिविधिमे सक्रिय रहला कारणेँ हुनका सभक स्थानीय युवामे नीक पकड़ मानल जाइत अछि।
पार्टी कार्यकर्तासभक कहब अछि जे बांकीपुर उपचुनावमे युवाशक्तिक सक्रिय भागीदारी आ लगातार जनसंपर्क अभियानक महत्वपूर्ण योगदान रहल। अंतिम परिणामक आधिकारिक घोषणा शेष अछि, मुदा रुझानसभसँ उत्साहित समर्थकसभ जीतक उत्सव मनाबए शुरू कऽ देने छथि।