हालहि मे नीट परीक्षा रद्द होएबाक खबरि पूरा देश केँ झकझोरि देलक। कारण बताओल गेल—पेपर लीक। ई कोनो छोट घटना नहि अछि। ई केवल एकटा परीक्षा रद्द होयब नहि, बल्कि लाखों छात्रक भविष्य, हुनकर मेहनत आ मानसिक स्वास्थ्य पर सीधा प्रहार अछि। जखन कोनो छात्र दू-दू, तीन-तीन वर्ष दिन-रात मेहनत करैत अछि आ अंत मे परीक्षा परहि सवाल उठि जाए, तऽ ई केवल प्रशासनिक विफलता नहि, बल्कि गम्भीर प्रणालीगत समस्या केर संकेत अछि। एहि तरहक घटना देशक शिक्षा व्यवस्था पर गम्भीर चोट अछि।
नीट जेकाँ परीक्षा आयोजित करएबाली संस्था एक सरकारी निकाय अछि। सामान्यतः एहि तरहक संस्थाक शीर्ष पर आईएएस अथवा अन्य यूपीएससी-योग्य अधिकारी नियुक्त कएल जाइत छथि। मानल जाइत अछि जे एहन अधिकारी अत्यन्त प्रतिभाशाली आ प्रशासनिक रूप सँ सक्षम होइत छथि। मुदा एतय एक महत्वपूर्ण प्रश्न उठैत अछि—की केवल प्रशासनिक योग्यता एतेक पैघ आ तकनीकी रूप सँ जटिल परीक्षा केँ निष्पक्ष आ सुरक्षित ढंग सँ संचालित करबाक लेल पर्याप्त अछि?
यूपीएससी-योग्य अधिकारीक पृष्ठभूमि विविध होइत अछि। कियो बिजली विभाग सँ, कियो स्वास्थ्य विभाग सँ, तऽ कियो वन विभाग सँ आबैत छथि। अचानक हुनका एहन संस्थाक जिम्मेदारी दऽ देल जाइत अछि जतय लाखों छात्रक परीक्षा आयोजित करबाक चुनौती रहैत अछि। जँ नीट आ जेईई दुनू केँ जोड़ल जाए तऽ ई संख्या 20 लाख सँ बेसी भऽ जाइत अछि। एतेक पैघ स्तर पर परीक्षा आयोजित करब केवल प्रशासनिक काज नहि, बल्कि तकनीकी समझ, सुरक्षा प्रबंधन, डेटा हैंडलिंग आ उच्चस्तरीय प्रोफेशनल दक्षता माँगैत अछि।
कहल जाइत अछि जे एहि अधिकारीसभक कार्यशैली मुख्यतः “पीपल्स मैनेजमेंट” पर आधारित होइत अछि। अर्थात् लोक केँ मैनेज करब—कखनो अधिकार देखाकऽ, कखनो दबाव बनाकऽ, तऽ कखनो संबंधक उपयोग सँ। मुदा प्रश्न अछि—की एतेक संवेदनशील आ तकनीकी कार्य मे केवल “लोक प्रबंधन” पर्याप्त अछि? की विशेषज्ञता आ अनुभवक आवश्यकता नहि अछि?
अक्सर आरोप लगैत अछि जे एहि तंत्र मे प्रोफेशनल नैतिकता आ पारदर्शिता केर कमी रहैत अछि। जँ कोनो व्यवस्था मे लम्बा समय धरि बेईमानी, घूसखोरी आ चापलूसी जेकाँ प्रवृत्ति बनल रहय, तऽ धीरे-धीरे ओहि संस्थाक कार्यसंस्कृतिक हिस्सा बनि जाइत अछि। एहन वातावरण मे ईमानदारी आ जवाबदेहीक अपेक्षा कठिन भऽ जाइत अछि।
कार्यप्रणाली पर नजरि देल जाए तऽ शीर्ष अधिकारी अपन अधीनस्थ केँ काज सौंपैत छथि, ओ अपन अधीनस्थ केँ, आ अन्ततः वास्तविक काज क्लेरिकल स्टाफ धरि पहुँचैत अछि। एहि श्रृंखला मे जँ कतहु ईमानदारीक कमी हो, तऽ पूरा सिस्टम प्रभावित भऽ सकैत अछि। पेपर लीक जेकाँ घटनासभ एहि कमजोर कड़ीक परिणाम हो सकैत अछि।
आब सवाल उठैत अछि—की एतेक पैघ परीक्षा ईमानदारीपूर्वक आयोजित करब सम्भव अछि? उत्तर स्पष्ट अछि—हाँ, बिल्कुल सम्भव अछि। हमरा सभक पास उदाहरण अछि। Indian Institutes of Technology केर परीक्षा वर्षों सँ आयोजित होइत आबि रहल अछि। 1997 मे एक बेर पेपर लीकक घटना भेल, मुदा ओकरा बाद व्यवस्था एतेक मजबूत कएल गेल जे फेर एहन घटना नहि देखल गेल।
एहि प्रकारेँ Union Public Service Commission स्वयं अपन परीक्षा आयोजित करैत अछि, जाहि मे लाखों अभ्यर्थी शामिल होइत छथि। एहि परीक्षाक विश्वसनीयता पर गम्भीर प्रश्नचिह्न नहि लगल अछि। एहि सँ स्पष्ट अछि जे इच्छाशक्ति आ मजबूत व्यवस्था हो तऽ निष्पक्ष परीक्षा सम्भव अछि।
तऽ समस्या कतय अछि? समस्या ओहि सोच मे अछि जतय प्रोफेशनल कौशल आ विशेषज्ञता केँ पर्याप्त महत्व नहि देल जाइत अछि। जखन एतेक तकनीकी आ संवेदनशील कार्य केँ केवल प्रशासनिक नजरिया सँ देखल जाए, तऽ त्रुटि स्वाभाविक अछि। परीक्षा आयोजन केवल फाइल आ आदेशक खेल नहि अछि; ई साइबर सुरक्षा, लॉजिस्टिक्स, मानव संसाधन प्रबंधन आ निगरानी तंत्रक सटीक समन्वय माँगैत अछि।
जखन नेतृत्व स्तर पर प्रोफेशनल विशेषज्ञताक कमी रहैत अछि, तऽ सिस्टम केवल आदेश आ दबावक सहारे चलैत अछि। एहन स्थिति मे नीचला स्तरक गड़बड़ी समय पर पकड़ब कठिन भऽ जाइत अछि। आ जखन गड़बड़ी सामने अबैत अछि, तखन बहुत देरी भऽ चुकल होइत अछि।
एकर सबसँ पैघ खामियाजा छात्रसभ भुगतैत छथि। ओ अपन समय, ऊर्जा आ संसाधन लगबैत छथि, मुदा अन्त मे निराशा आ अनिश्चितता हाथ लगैत अछि। ई केवल व्यक्तिगत क्षति नहि, बल्कि देशक प्रतिभाक संग अन्याय सेहो अछि।
एहि स्थिति केँ सुधारबाक लेल आवश्यक अछि जे परीक्षा आयोजन संस्थासभ मे प्रोफेशनलिज़्म केँ प्राथमिकता देल जाए। तकनीकी विशेषज्ञ, साइबर सुरक्षा विशेषज्ञ आ परीक्षा प्रबंधन मे अनुभवी लोक केँ नेतृत्व भूमिका देल जाए। संगहि पारदर्शिता आ जवाबदेही सुनिश्चित करबाक लेल मजबूत निगरानी तंत्र विकसित कएल जाए।
अन्ततः बुझबाक आवश्यकता अछि जे परीक्षा केवल प्रक्रिया नहि, बल्कि लाखों सपनाक कसौटी अछि। एहि मे कोनो प्रकारक लापरवाही स्वीकार्य नहि भऽ सकैत अछि। जँ युवासभक भविष्य सुरक्षित रखबाक अछि, तऽ व्यवस्था केँ ओतबे मजबूत आ विश्वसनीय बनाबय पड़त जितबा हुनकर मेहनत आ उम्मीद अछि।
आवश्यक कदम:
- शिक्षा मंत्री पर जवाबदेही तय हो।
- परीक्षा संचालन व्यवस्था की स्वतंत्र समीक्षा हो।
- प्रोफेशनल विशेषज्ञक भूमिका बढ़ाओल जाए।
- National Testing Agency मे एहन विशेषज्ञ नेतृत्व लाओल जाए जे बड़े पैमाना पर निष्पक्ष परीक्षा संचालनक अनुभव रखैत होथि।