नई दिल्ली। ऑल इंडिया CGHS एम्प्लोयीज एसोसिएशन (AICGHSEA) कर्मचारी सभक लंबित मांग आ कथित प्रशासनिक उदासीनता केँ लऽ कऽ केंद्रीय स्वास्थ्य सेवा महानिदेशालय (CGHS) प्रशासन पर गंभीर सवाल उठौने अछि। संगठन चेतावनी देने अछि जे यदि शीघ्र ठोस कार्रवाई नहि भेल तऽ देशभरि मे आंदोलन शुरू कएल जाएत।
AICGHSEA केर राष्ट्रीय महासचिव शशिकान्त शर्मा बुधदिन जारी कएल एकटा कड़ा बयान मे कहलनि जे संघक तरफ सँ कई बेर निदेशक, CGHS सँ मुलाकात आ लिखित प्रतिवेदन देल गेल, मुदा कर्मचारी आ संगठन सँ जुड़ल वैध मुद्दा पर एखन धरि कोनो ठोस निर्णय नहि लेल गेल अछि।
हुनका अनुसार भारत सरकार सँ मान्यता प्राप्त एहि कर्मचारी संगठन द्वारा उठाओल गेल जायज मुद्दा प्रति निदेशक, CGHS केर उदासीन रवैया अत्यंत चिंताजनक अछि। शर्मा कहलनि जे एहि कारणे विभिन्न शहर मे तैनात अपर निदेशक सभ केँ मनमानी करबाक अवसर भेटि रहल अछि।
हुनका आरोप अछि जे मेरठ आ शिलोंग मे तैनात अपर निदेशक संघक शाखा नेतृत्व केँ सीधा निशाना बना रहल छथि आ RSA Rules 1993 केर प्रावधानक जानबूझि उल्लंघन कऽ रहल छथि।
शर्मा कहलनि जे AICGHSEA केर संवैधानिक रूप सँ निर्वाचित प्रतिनिधि सभ केँ अपन-अपन शाखा सँ दूर रखबाक प्रयास कएल जा रहल अछि, जे स्पष्ट रूप सँ एंटी-यूनियन मानसिकता केँ दर्शबैत अछि। एहि पूरा मामला मे निदेशक, CGHS केर भूमिका केँ हुनका “मूक दर्शक” करार देलनि।
लंबित मुद्दा पर जतौलनि नाराजगी
संघ आरोप लगाने अछि जे कर्मचारी कल्याण सँ जुड़ल कई महत्वपूर्ण मुद्दा लम्बा समय सँ लंबित अछि। एहि मे प्रमुख रूप सँ शामिल अछि—
क्लेरिकल, MA, LMA आ MTS सहित विभिन्न कैडरक कैडर रीस्ट्रक्चरिंग
ECG तकनीशियन सभक पे-एनोमली
ADM आ DM पद पर भर्ती
संघक कहब अछि जे चार्टर ऑफ डिमांड पर भेल आधिकारिक बैठक मे जाहि मुद्दा केँ मौखिक रूप सँ स्वीकार कएल जाइत अछि, ओकरा बाद मे मिनट्स ऑफ मीटिंग मे नकारि देल जाइत अछि। एहि सँ कर्मचारी आ प्रशासनक बीच अविश्वास बढ़ि रहल अछि।
भ्रष्टाचार आ आदेश अवहेलनाक आरोप
AICGHSEA आशंका जतौने अछि जे किछु स्थानांतरण आ अन्य प्रशासनिक निर्णयक पाछाँ भ्रष्टाचारक भूमिका होय सकैत अछि।
संघ विशेष रूप सँ अपर निदेशक, मेरठ पर केंद्रीय प्रशासनिक अधिकरण (CAT) केर आदेशक कथित अवहेलना करबाक आरोप लगौने अछि आ एकरा गंभीर मामला बतौने अछि।
संघक प्रमुख मांग
AICGHSEA निदेशक, CGHS सँ मांग केने अछि जे—
अपर निदेशक, मेरठ केँ तत्काल पद सँ हटाओल जाए
यदि अपर निदेशक, शिलोंग शाखा महासचिवक RSA Rules 1993 अनुसार तत्काल स्थानांतरण नहि करैत छथि, तऽ हुनको हटाओल जाए
देशभरिक 24 शाखाक अपर निदेशक सभ केँ स्पष्ट एडवाइजरी जारी कएल जाए
शाखा पदाधिकारी सभ संग नियमित बैठक सुनिश्चित कऽ समस्या सभक समयबद्ध समाधान कएल जाए
आंदोलनक चेतावनी
शशिकान्त शर्मा स्पष्ट कहलनि जे यदि शीघ्र आ प्रभावी कार्रवाई नहि भेल तऽ संगठन अपन संवैधानिक अधिकारक प्रयोग करैत देशव्यापी आंदोलन, धरना-प्रदर्शन आ अन्य कड़ा कदम उठाबय लेल बाध्य होयत।
हुनका स्पष्ट शब्द मे कहब छल जे एहन स्थिति उत्पन्न होएबाक पूर्ण जिम्मेदारी प्रशासन पर रहत।