नई दिल्ली। दिल्लीक मुख्यमंत्री रेखा गुप्ता कहलनि जे 1 अगस्त सँ दिल्लीक महिलासभक जीवनमे सम्मान, आत्मनिर्भरता आ आत्मविश्वासक नव अध्याय शुरू भऽ रहल अछि। हुनका घोषणा कएलनि जे दिल्ली लक्ष्मी योजना लेल ऑनलाइन निबंधन पोर्टल आब खोलि देल गेल अछि।
मुख्यमंत्री कहलनि जे एहि योजनाक अंतर्गत पात्र महिलासभ केँ प्रत्येक मास ₹2,500 केर आर्थिक सहायता देल जाएत। हुनक अनुसार ई केवल आर्थिक सहयोग नहि, बल्कि महिलासभ केँ आत्मनिर्भर बनेबाक, आत्मविश्वास बढ़ेबाक आ स्वावलंबी जीवन जीबय लेल प्रेरित करबाक महत्वपूर्ण पहल अछि।
महिलासभ केँ भेटत आर्थिक संबल
रेखा गुप्ता कहलनि जे ककरो लेल ई ओकर नाम पर पहिल बचत होयत, तँ ककरो लेल दवा, बच्चाक पढ़ाइ अथवा घरक आवश्यक खर्च पूरा करबाक आधार बनत। हुनका अनुसार एहि योजनाक उद्देश्य महिलासभ केँ अपन दैनिक आवश्यकताक लेल दोसर पर निर्भर रहबाक मजबूरी सँ मुक्ति देब अछि।
हुनका कहलनि जे एहि आर्थिक सहयोग सँ महिलासभक आत्मविश्वास बढ़त, निर्णय लेबाक क्षमता मजबूत होयत आ ओ सभ सम्मान आ स्वतंत्रताक संग अपन जीवन जीबि सकत।
ऑनलाइन निबंधन शुरू
दिल्ली सरकार पात्र महिलासभ सँ आग्रह केने अछि जे ओ सभ दिल्ली लक्ष्मी योजना केर आधिकारिक पोर्टल पर जाइत अपन निबंधन अवश्य करथि, जाहिसँ समय पर योजनाक लाभ प्राप्त कएल जा सकय।
महिला सशक्तिकरण दिशामे महत्वपूर्ण कदम
दिल्ली सरकारक अनुसार दिल्ली लक्ष्मी योजना महिलासभक आर्थिक सशक्तिकरण, सामाजिक सुरक्षा आ समावेशी विकासक दिशामे एक महत्वपूर्ण पहल अछि। सरकारक विश्वास अछि जे ई योजना महिलासभ केँ आर्थिक रूप सँ मजबूत बनेबाक संग-संग “विकसित दिल्ली” केर संकल्प पूरा करबामे सेहो महत्वपूर्ण भूमिका निभायत।