नई दिल्ली। सिंगापुर एयरलाइंस (SIA) केर कम लागत वाली एयरलाइन स्कूट (Scoot) सोनी पिक्चर्सक बहुप्रतीक्षित फिल्म Spider-Man: Brand New Day संग विशेष साझेदारीक घोषणा कएलक अछि। एहि साझेदारीक तहत 13 सितंबर 2026 धरि यात्री स्पाइडर-मैन थीम पर आधारित अनोखा उड़ान अनुभवक आनंद लऽ सकताह।
एयरलाइनक अनुसार लोकप्रिय सुपरहीरो स्पाइडर-मैनक थीम एयरबस A321neo आ बोइंग 787 ड्रीमलाइनर सहित दू विशेष विमान पर देखल जा सकत। एहि विमानसभक अंदर विशेष डेकल्स, स्पाइडर-मैन डिजाइनयुक्त हेडरेस्ट कवर आ फिल्मक संगीत यात्राक अनुभवकेँ आओर रोमांचक बनाएत।
यात्रीसभकेँ भेटत विशेष उपहार
स्कूट बतौलक जे विमानमे खरीदारी करनिहार यात्रीसभकेँ विशेष मर्चेंडाइज भेटबाक अवसर भेटत। निर्धारित शर्तसभक अधीन फ्लाइट टैग अथवा फोल्ड होमए वाला इको बैग उपहार स्वरूप देल जा सकैत अछि।
जून आ जुलाईसँ शुरू होएत विशेष उड़ान
स्पाइडर-मैन थीम वाला बोइंग 787 ड्रीमलाइनर 30 जून 2026 कऽ टोक्यो (हानेडा) लेल पहिल उड़ान भरत, जखन कि एयरबस A321neo 1 जुलाई 2026 कऽ चियांग माई लेल उड़ान शुरू करत।
एकर बाद ई विशेष विमान ऑस्ट्रेलिया, चीन, जापान, फिलीपींस आ थाईलैंडक चुनिंदा शहरसभक उड़ानमे शामिल रहत। नियमित उड़ान परिचालनक कारण आन रूट पर यात्रा करनिहार यात्रीसभकेँ सेहो आकस्मिक रूपसँ एहि थीमयुक्त विमानमे यात्रा करबाक अवसर भेटि सकैत अछि।
चांगी एयरपोर्टसँ शुरू होएत स्पाइडर-मैन अनुभव
यात्रीसभ लेल एहि अनुभवकेँ आओर खास बनाबए लेल सिंगापुर चांगी एयरपोर्टक टर्मिनल-1 स्थित चेक-इन काउंटरसभ पर स्पाइडर-मैन थीम आधारित विशेष इंस्टॉलेशन लगाओल जाएत। एहि सँ यात्राक रोमांच उड़ान शुरू होएबाक पहिनेसँ शुरू भऽ जाएत।
ग्राहकेँ यादगार अनुभव देबाक प्रयास
स्कूटक मुख्य वाणिज्यिक अधिकारी कैल्विन चैन कहलनि, “सोनी पिक्चर्सक Spider-Man: Brand New Day संग साझेदारी कऽ हमसभ अत्यंत उत्साहित छी। एहि सहयोगक माध्यमसँ हम अपन यात्रीसभकेँ एकटा रोमांचक आ अविस्मरणीय यात्रा अनुभव प्रदान कऽ रहल छी। ई पहल ग्राहक संतुष्टि आ नवाचारक प्रति स्कूटक प्रतिबद्धताकेँ दर्शबैत अछि।”
वेबसाइट आ मोबाइल ऐप पर उपलब्ध अछि बुकिंग
एयरलाइनक अनुसार थीमयुक्त उड़ानसभक पहचान आ बुकिंग स्कूटक वेबसाइट, मोबाइल ऐप आ WeChat मिनी प्रोग्राम पर आसानीसँ कएल जा सकैत अछि। उड़ान समय-सारिणी समय-समय पर वेबसाइट पर अपडेट कएल जाएत, मुदा ई सरकारी आ नियामकीय स्वीकृतिक अधीन रहत।
30 जुलाई कऽ रिलीज होएत फिल्म
उल्लेखनीय अछि जे सोनी पिक्चर्स इंडिया Spider-Man: Brand New Day केँ 30 जुलाई 2026 कऽ भारतक सिनेमाघरसभमे अंग्रेजी, हिंदी, तमिल, तेलुगु, कन्नड़ आ मलयालम भाषामे रिलीज करत। फिल्म सभ प्रमुख प्रीमियम फॉर्मेटमे उपलब्ध रहत।
एहि साझेदारीसँ फिल्म प्रेमी आ यात्रीसभ दुनूक लेल मनोरंजन आ यात्रा अनुभवक एकटा नव अध्याय शुरू होएबाक उम्मीद व्यक्त कएल जा रहल अछि।