मुंबई। बहुप्रतीक्षित बांग्ला फिल्म ‘बहुरूपी: द गोल्डन डाकू’ केर इंतजार कऽ रहल दर्शकसभ लेल खुशखबरी अछि। फिल्मक निर्माता सभ अभिनेता आ निर्देशक शिबोप्रसाद मुखर्जी केर पहिल कैरेक्टर पोस्टर जारी कएने छथि। पोस्टर सामने अबिते सोशल मीडिया पर फिल्मक चर्चा तेज भऽ गेल अछि आ दर्शकसभमे उत्साह बढ़ि गेल अछि।
पोस्टरमे शिबोप्रसाद मुखर्जी गंभीर आ प्रभावशाली अंदाजमे देखाइ पड़ैत छथि। हुनकर नव लुक रहस्य, रोमांच आ दमदार व्यक्तित्वसँ भरल अछि। सुपरहिट फिल्म ‘बहुरूपी’ केर सफलता कऽ बाद आब एकर सीक्वल पहिलसँ बेसी भव्य स्तर पर तैयार कएल गेल अछि। फिल्मक कथा रहस्यमय ‘गोल्डन डाकू’ केर इर्द-गिर्द घूमैत अछि, जाहिमे एक्शन, भावना आ सस्पेंसक भरपूर संगम देखबाकेँ भेटत।
फिल्मक निर्देशन प्रसिद्ध निर्देशक जोड़ी नंदिता रॉय आ शिबोप्रसाद मुखर्जी कएने छथि। दुनू फेर एकबेर दर्शकसभ लेल मनोरंजन आ मजबूत कथावस्तुक संग अनूठ अनुभव लऽ कऽ आबि रहल छथि। ई फिल्म दुर्गा पूजा 2026 केर अवसर पर सिनेमाघरसभमे रिलीज होयत।
फर्स्ट लुक साझा करैत शिबोप्रसाद मुखर्जी अपन फेसबुक पोस्टमे कहलनि जे ओ फेर एकबेर ‘विक्रम प्रमाणिक’ केर भूमिका निभाबऽ जा रहल छथि। हुनकर अनुसार, विंडोज़ प्रोडक्शन केर 25 वर्ष पूरा होबाक अवसर पर ई हुनकर दोसर पैघ प्रस्तुति अछि, आ एहि फिल्मकेँ आब धरिक सबसँ भव्य प्रोजेक्टमे सँ एक मानल जा रहल अछि।
हुनका अनुसार फिल्मक शूटिंग 96 अलग-अलग लोकेशन पर कएल गेल, जाहिमे मुख्य आ सहायक कलाकारसभ सहित करीब 2,500 लोक सहभागी रहलाह। शूटिंग हसनाबाद, टाकी, बारासात, बर्दवान, बोलपुर, बिष्णुपुर, मालदा आ आन कतेको स्थान पर सम्पन्न भेल।
शिबोप्रसाद कहलनि जे पहिल फिल्म जकाँ एहि बेर सेहो बहुरूपी लोक कलाकार कथाक महत्वपूर्ण हिस्सा छथि। विशेष रूपसँ मालदाक प्रसिद्ध गम्भीरा लोक कलाकार सभकेँ फिल्ममे जोड़ल गेल अछि। हुनकर पारंपरिक गीत, मुखौटा आ प्रस्तुति फिल्मकेँ विशिष्ट सांस्कृतिक पहचान देत।
हुनका ईहो कहलनि जे चुनावक कारण शूटिंग कार्यक्रम प्रभावित भेल आ भीषण गर्मीमे फिल्मांकन करब चुनौतीपूर्ण छल। मुदा सम्पूर्ण टीमक मेहनत, समर्पण आ जुनूनक बदौलत एहि परियोजनाकेँ सफलतापूर्वक पूरा कएल जा सकल।
उल्लेखनीय अछि जे विंडोज़ प्रोडक्शन पछिला किछु वर्षसभमे लगातार सफल फिल्म दऽ बांग्ला सिनेमा मे अपन मजबूत पहचान बना लेने अछि। प्रभावशाली कहानी आ हर आयु वर्गक दर्शकसभ सँ जुड़बाक क्षमता एकरा उद्योगक भरोसेमंद प्रोडक्शन हाउससभमे स्थान दैत अछि।
फर्स्ट लुक जारी होएबाक बाद ‘बहुरूपी: द गोल्डन डाकू’ लेल दर्शकसभक उत्सुकता आरो बढ़ि गेल अछि। उम्मीद कएल जा रहल अछि जे ई फिल्म दुर्गा पूजा 2026 केर सबसे पैघ बांग्ला रिलीजमे सँ एक साबित होयत आ दर्शकसभकेँ रहस्य, रोमांच, एक्शन आ भावनासँ भरल भव्य सिनेमाई अनुभव देत।