नई दिल्ली। रामानंद सागर के ‘रामायण’ मे लक्ष्मण के भूमिका केनिहार सुनील लहरी के भगवान राम के किरदार मे रणबीर कपूर नहि सोहेलन्हि। हुनका कहब अछि जे रणबीर मे राम जेकाँ मासूमियत नहि अछि।
‘रामायणम्’ के टीजर देखि एक्टर सुनील लहरी, जे रामानंद सागर के ‘रामायण’ मे ‘लक्ष्मण’ बनि घर-घर प्रसिद्ध भ’ गेल छलाह, कहलनि जे हुनका मे ओ मासूमियत नहि अछि जे अरुण गोविल मे छल। ‘एनिमल’ के बाद भगवान राम के रूप मे रणबीर के देखब कठिन अछि।
सुनील लहरी कहलनि, ‘हमरा लेल टीजर एकटा शोकेस जेकाँ अछि, जतय भव्य कैनवास, विजुअली समृद्ध बैकग्राउंड आ आधुनिक VFX देखाओल जाइत अछि।
ओ कहलनि जे ‘रामायणम्’ के टीजर देखि हुनका कतहुँ इमोशन सँ कनेक्शन महसूस नहि भेल। ओ फेर रामानंद सागर के ‘रामायण’ के उदाहरण दैत कहलनि, ‘अहाँ दुनियाँ के कोनो पैघ फिल्म ल’ लिअ—‘अवेंजर्स’, ‘अवतार’, ‘टाइटेनिक’… सभ मे बहुत मजबूत भावना रहल अछि। हमर ‘रामायण’ मे भले बेस्ट VFX नहि छल, बजट सेहो कम छल, मुदा भावना एतेक मजबूत छल जे 37-38 बरख बादो ई भारतीय महाकाव्य के सर्वोत्तम रूपांतरण मानल जाइत अछि।’
ओ कहलनि जे अगर फिल्म मे भावना मजबूत नहि होयत, तँ अहाँ कतबो हजार करोड़ खर्च क’ लिअ, दर्शक कनेक्ट नहि करताह आ फिल्म नहि चलत। ‘इमोशन बहुत जरूरी अछि।’
रणबीर कपूर के राम के लुक पर सुनील लहरी कहलनि जे रणबीर ठीक देखाइत छथि, मुदा मासूमियत किछु कम अछि। जे शीतलता, धैर्य आ मासूमियत अरुण गोविल मे छल, ओ रणबीर मे कम देखाइत अछि। मुदा हमरा विश्वास अछि जे ओ अपन एक्टिंग सँ राम के किरदार के न्याय देताह।’
रणबीर कपूर पिछला बेर ‘एनिमल’ मे देखायल छलाह, जतय हुनकर रोल बहुत आक्रामक छल, आ आब ओ भगवान राम के किरदार मे छथि। एहि पर सुनील लहरी कहलनि, ‘ई थोड़े कठिन भ’ जाइत अछि। ओ किछु कठोर देखाइत छथि। ओ लक्ष्मण या भरत के किरदार लेल बेसी उपयुक्त छथि। एहन किरदार लेल नया चेहरा लेनाय बेसी नीक होइत अछि।’
ओ कहलनि जे जखन अहाँ कोनो सुपरस्टार के कास्ट करैत छी, तँ दर्शक के मन मे पहिने सँ हुनकर छवि बनल रहैत अछि। ‘कोनो अभिनेता लेल अपन पुरान छवि छोड़ि क’ नया किरदार मे पूर्णतः ढलि जेनाय बहुत कठिन होइत अछि।’ सुनील लहरी आशा व्यक्त केलनि जे ‘रामायणम्’ दर्शक के निराश नहि करत आ लोक के पसिन आएत।