नई दिल्ली। मंगलक दिन दिल्ली-एनसीआर मे भेल जोरदार वर्षासँ मौसमक मिजाज पूर्ण रूपेँ बदलि गेल। दिल्ली, नोएडा आ आसपासक कतेको इलाकामे तेज वर्षा, आंधी-तूफान आ तेज हवाक कारण लोकसभ केँ बीतल किछु दिनसँ पड़ि रहल भीषण गर्मी आ उमस सँ पैघ राहत भेटल। वर्षाक बाद तापमानमे उल्लेखनीय गिरावट दर्ज कएल गेल, जाहिसँ समूचा क्षेत्रक मौसम काफी सुहावन भऽ गेल।
भारतीय मौसम विज्ञान विभाग (आईएमडी) एहि सँ पहिने राष्ट्रीय राजधानी लेल येलो अलर्ट जारी कएने छल। विभाग हल्का सँ मध्यम वर्षा, गरज-चमक, बिजली कड़कबाक आ तेज हवाक संभावना व्यक्त करैत लोकसभ केँ सतर्क रहबाक सलाह देने छल। संगहि यात्रा पर निकलए सँ पहिने नवीनतम मौसम पूर्वानुमान देखबाक आग्रह सेहो कएल गेल छल।
आईएमडीक अनुसार, 7 जुलाई सँ 11 जुलाई धरि दिल्ली, हरियाणा, पंजाब आ चंडीगढ़मे वर्षाक गतिविधि जारी रहबाक संभावना अछि। विभागक अनुमान अछि जे 7 जुलाई आ 9 जुलाई केँ किछु स्थानसभ पर अपेक्षाकृत बेसी वर्षा भऽ सकैत अछि।
मौसम विभागक पूर्वानुमानक अनुसार मंगलक दिन दिल्लीक अधिकतम तापमान 35 सँ 37 डिग्री सेल्सियस आ न्यूनतम तापमान 26 सँ 28 डिग्री सेल्सियस केर बीच रहबाक संभावना अछि। विभागक कहब अछि जे आगामी सात दिनमे अधिकतम तापमानमे कोनो पैघ बदलावक संभावना नहि अछि।
आईएमडीक अनुसार, आगामी दू दिन धरि न्यूनतम तापमान लगभग स्थिर रहत। एकर बाद अगिला तीन दिनमे एहि मे 1 सँ 2 डिग्री सेल्सियस तकक कमी आबि सकैत अछि, तकर बाद फेर तापमानमे हल्का बढ़ोतरी होएबाक संभावना अछि।
मौसम विशेषज्ञसभक मानब अछि जे मानसूनी गतिविधि सक्रिय रहबाक कारण आगामी दिनसभमे सेहो दिल्ली-एनसीआरक लोकसभ केँ गर्मीसँ राहत भेटैत रहत। हालांकि, गरज-चमक, बिजली कड़कबाक आ तेज हवाक दौरान विशेष सावधानी बरतबाक सलाह देल गेल अछि।