नई दिल्ली। प्रधानमंत्री नरेंद्र मोदीक (Narendra Modi) अध्यक्षतामे बुध दिन आयोजित केंद्रीय मंत्रिमंडलक बैठकमे अनेक महत्वपूर्ण निर्णय लेल गेल। बैठकक शुरुआत प्रधानमंत्रीक स्वागत आ अभिनंदनसँ भेल, जतय मंत्रिमंडलक सदस्यसभ ठाढ़ भऽ कऽ हुनकर अभिवादन कएलनि। एहि अवसर पर केंद्रीय मंत्रिमंडल प्रधानमंत्री नरेंद्र मोदीक लगातार सभसँ बेसी समय धरि निर्वाचित प्रधानमंत्रीक रूपमे सेवा देबाक नव कीर्तिमान पर विशेष अभिनंदन प्रस्ताव सेहो पारित कएलक।

बैठकक बाद आयोजित प्रेस वार्तामे केंद्रीय सूचना एवं प्रसारण मंत्री अश्विनी वैष्णव जानकारी देलनि जे प्रधानमंत्री नरेंद्र मोदी लगातार 4,399 दिन धरि निर्वाचित प्रधानमंत्रीक रूपमे कार्य करैत भारतक प्रथम प्रधानमंत्री जवाहरलाल नेहरूक 4,398 दिनक रिकॉर्डकेँ पाछाँ छोड़ि देने छथि। मंत्रिमंडल एहि उपलब्धिकेँ भारतीय लोकतंत्र, जनभागीदारी आ जनताक अटूट विश्वासक प्रतीक बतौलक।

अभिनंदन प्रस्तावमे कहल गेल जे प्रधानमंत्री मोदीक नेतृत्वमे राष्ट्रीय जनतांत्रिक गठबंधन (एनडीए) सरकार अपन 12 वर्ष पूरा कऽ लेने अछि आ देश छह दशकक बाद लगातार तेसर बेर एकहि सरकारकेँ जनादेश देने अछि। प्रस्तावमे प्रधानमंत्रीक “सबका साथ, सबका विकास, सबका विश्वास आ सबका प्रयास” मंत्रक उल्लेख करैत कहल गेल जे गरीब कल्याणकेँ शासनक केंद्र बिंदु बनाओल गेल अछि।

मंत्रिमंडल कहलनि जे सरकारक विभिन्न योजनाक माध्यमसँ करोड़ों लोककेँ पक्का मकान, बिजली, स्वच्छ पेयजल, प्रत्यक्ष लाभ अंतरण, 80 करोड़ लोककेँ मुफ्त राशन आ 60 करोड़सँ अधिक गरीब लोककेँ स्वास्थ्य सुरक्षाक सुविधा उपलब्ध कराओल गेल अछि। प्रस्तावमे दावा कएल गेल जे एहि प्रयाससभक परिणामस्वरूप 25 करोड़सँ अधिक लोक गरीबीसँ बाहर निकलयमे सफल भेल छथि।

प्रस्तावमे महिला सशक्तिकरण, लाखपति दीदी अभियान, संसद आ विधानमंडलसभमे महिलाक लेल 33 प्रतिशत आरक्षण, स्टार्टअप आ नवाचारकेँ बढ़ावा देबाक प्रयासक सेहो सराहना कएल गेल। मंत्रिमंडल भारतकेँ विश्वक तेसर सभसँ पैघ स्टार्टअप इकोसिस्टम बनेबाक उपलब्धिक उल्लेख सेहो कएलक।

राष्ट्रीय सुरक्षाक क्षेत्रमे अनुच्छेद 370 हटेबा, वस्तु एवं सेवा कर (जीएसटी), वन रैंक वन पेंशन, नागरिकता संशोधन अधिनियम (सीएए), भारतीय न्याय संहिता आ श्रम संहिताकेँ ऐतिहासिक सुधार बताओल गेल। एकर अतिरिक्त सर्जिकल स्ट्राइक, एयर स्ट्राइक, ऑपरेशन सिंदूर, नक्सलवाद पर नियंत्रण आ पूर्वोत्तर भारतमे शांति समझौता सभकेँ सरकारक प्रमुख उपलब्धिक रूपमे गिनाओल गेल।

अहमदाबाद मेट्रो विस्तार परियोजनाकेँ मंजूरी

मंत्रिमंडल अहमदाबाद मेट्रो रेल परियोजनाक दोसर चरण अंतर्गत चरण-2C केँ मंजूरी प्रदान कएलक। लगभग 6 किलोमीटर लंबा एहि नव कॉरिडोरमे पाँचटा स्टेशन बनाओल जाएत, जाहिमे चारि एलिवेटेड आ एकटा भूमिगत स्टेशन होयत। ई मार्ग कोटेश्वर रोडसँ अहमदाबाद हवाई अड्डा धरि विकसित कएल जाएत।

परियोजनापर 2,179 करोड़ रुपयासँ अधिक खर्च होयबाक अनुमान अछि। एकरा पूरा भेला पर अहमदाबाद आ गांधीनगरक कुल मेट्रो नेटवर्क लगभग 78 किलोमीटर भऽ जाएत। सरकारक अनुसार, एहि परियोजनासँ एयरपोर्ट कनेक्टिविटी बेहतर होयत, ट्रैफिकक दबाव घटत आ पर्यावरण संरक्षणकेँ बढ़ावा भेटत। निर्माण कालमे लगभग 2,000 आ संचालन कालमे 500 लोककेँ रोजगार भेटबाक संभावना अछि।

अमरावतीमे केंद्रीय कर्मचारीसभक लेल आवासीय परिसर

आर्थिक मामलाक मंत्रिमंडलीय समितिए आंध्र प्रदेशक नव राजधानी अमरावतीमे केंद्रीय कर्मचारीसभक लेल आवासीय परिसर निर्माणकेँ मंजूरी देलक। लगभग 17 एकड़ क्षेत्रमे बनयवाला एहि परिसरमे 11 आवासीय टावर आ कुल 1,504 आवासीय इकाई विकसित कएल जाएत।

परियोजनाक अनुमानित लागत 1,234 करोड़ रुपयासँ अधिक अछि। परिसरमे बैंक, डाकघर, बाल देखभाल केंद्र, भोजनालय, अतिथि गृह आ शॉपिंग कॉम्प्लेक्स जकाँ सुविधा उपलब्ध कराओल जाएत। परियोजनाकेँ हरित भवन मानकक अनुरूप विकसित कएल जाएत आ दिव्यांगजनक लेल सुगम सुविधाक व्यवस्था सुनिश्चित कएल जाएत।

केंद्रीय कार्यालय परिसर निर्माणकेँ सेहो मंजूरी

मंत्रिमंडल अमरावतीमे केंद्रीय सरकारी कार्यालय परिसर निर्माणकेँ सेहो स्वीकृति प्रदान कएलक। लगभग 5.3 एकड़ क्षेत्रमे बनयवाला एहि परिसरमे दूटा विशाल कार्यालय भवन बनत, जाहिमे करीब 8,000 अधिकारी आ कर्मचारीक बैठबाक व्यवस्था रहत।

लगभग 1,299 करोड़ रुपयाक लागतसँ बनयवाला एहि परियोजनामे बैंक, डाकघर, सम्मेलन कक्ष, बहुउद्देश्यीय सभागार आ भोजनालय जकाँ सुविधासभ विकसित कएल जाएत। सरकारक अनुसार, विभिन्न केंद्रीय कार्यालयकेँ एकहि परिसरमे आनलासँ प्रशासनिक कार्यकुशलता बढ़त आ नागरिक सेवाक उपलब्धतामे सुधार होयत।

मंत्रिमंडल विश्वास व्यक्त कएलक जे प्रधानमंत्री नरेंद्र मोदीक नेतृत्वमे भारत आत्मनिर्भर, सुरक्षित आ समृद्ध राष्ट्र बनेबाक दिशामे तेजीसँ आगाँ बढ़ि रहल अछि। बैठकमे कहल गेल जे विगत 12 वर्षमे राजनीतिक स्थिरता, निर्णायक नेतृत्व आ दूरदर्शी नीतिसभ भारतकेँ विश्वक सभसँ तेजीसँ बढ़ैत प्रमुख अर्थव्यवस्थामे स्थापित कएने अछि।

मंत्रिमंडल प्रधानमंत्री नरेंद्र मोदीक स्वस्थ आ दीर्घायु जीवनक कामना करैत विकसित भारत-2047 केर लक्ष्य प्राप्त करबाक संकल्प दोहरौलक।