पटना। बिहारक चर्चित शिक्षक आ यूट्यूबर फैसल खान उर्फ खान सर शनिचर (6 जून 2026) केँ पटना सिविल कोर्ट पहुँचि कऽ सरेंडर कऽ देलनि। ओ अपन वकीलक संग अदालत पहुँचल छलाह। ई घटनाक्रम एहन समयमे सामने आएल अछि, जखन हुनका विरुद्ध दर्ज एफआईआरक बाद बिहार पुलिस गिरफ्तारीक प्रयास तेज कऽ देने छल।
खान सरक विरुद्ध हत्या के प्रयास आ आर्म्स एक्टक गंभीर धारासभक अंतर्गत मामला दर्ज कएल गेल अछि। मीडिया रिपोर्टक अनुसार, ई पूरा मामला पटना केर मुसल्लहपुर हाट स्थित खान ग्लोबल स्टडीज (KGS) सेंटरक बाहर भेल हिंसा आ फायरिंग सँ जुड़ल अछि।
जानकारी अनुसार, 5 जून केँ पटना पुलिस खान सरक विरुद्ध एफआईआर दर्ज केने छल। एफआईआरमे हुनका नामजद करैत हत्या के प्रयास आ आर्म्स एक्टक धारासभ लगाओल गेल। पुलिसक कहब अछि जे शुक्रवार सँ खान सर अपन संस्थान सँ अनुपस्थित छलाह, जाहि कारणे हुनकर खोजबीन तेज कएल गेल छल। एहि बीच हुनकर अदालत पहुँचबाक सूचना सामने आबि गेल।
पटना पुलिसक अनुसार, 2 जूनक राति मुसल्लहपुर हाट स्थित खान ग्लोबल स्टडीज सेंटरक बाहर हिंसक झड़प भेल छल। आरोप अछि जे करीब 20 गोटे कोचिंग संस्थान पर हमला कऽ पत्थरबाजी आ तोड़फोड़ केने छल। एहि दौरान एकटा सुरक्षा गार्डक संग मारपीट सेहो कएल गेल, जाहि कारणे ओकरा अस्पतालमे भर्ती कराबय पड़ल।
घटनाक बाद खान सर आरोप लगौने छलाह जे ई हमला प्रतिद्वंद्वी कोचिंग संस्थान ज्ञान बिंदु एकेडमी सँ जुड़ल लोकसभ द्वारा कराओल गेल। पुलिस एहि मामला मे ज्ञान बिंदु एकेडमीक निदेशक रौशन आनंद सहित तीन गोटेक गिरफ्तारी सेहो केने छल।
मुदा मामला ओहि समय नव मोड़ लऽ लेलक जखन सोशल मीडिया पर एकटा वीडियो वायरल भेल। वीडियोमे खान सरक निजी सुरक्षा गार्ड प्रदीप आ तलेश्वर हवा मे फायरिंग करैत देखल गेलाह। पुलिस वीडियो केर सत्यता जाँचलाक बाद 4 जून केँ दुनू गार्ड केँ गिरफ्तार कऽ लेलक।
पुलिस पूछताछमे गार्डसभ कथित रूप सँ स्वीकार केलक जे फायरिंग खान सरक निर्देश पर कएल गेल छल। यद्यपि एहि फायरिंगमे केओ घायल नहि भेल, तथापि एहि घटनाक आधार पर खान सरक विरुद्ध हत्या के प्रयास आ आर्म्स एक्टक तहत मामला दर्ज कएल गेल।
पटना पुलिस छात्रसभ सँ अपील केने अछि जे कोचिंग संस्थानसभक प्रतिस्पर्धा आ विवादमे कोनो प्रकारक बहकावामे नहि आबथि आ कानून-व्यवस्था बनाए रखबाक लेल प्रशासनक सहयोग करथि।
एहि मामलाक जांच जारी अछि आ अदालतमे सुनवाईक बाद आगामी कानूनी प्रक्रिया स्पष्ट होएत।