वाशिंगटन/यरुशलम: अमेरिकी राष्ट्रपति डोनाल्ड ट्रंप आ इजरायलक प्रधानमंत्री बेंजामिन नेतन्याहूक बीच भेल एकटा कथित फोन वार्ता अंतरराष्ट्रीय राजनीति मे चर्चा क विषय बनि गेल अछि। मीडिया रिपोर्टक अनुसार, लेबनानमे इजरायलक सैन्य अभियान आ ईरान संग अमेरिका कूटनीतिक वार्ताक बीच उत्पन्न तनावक कारण दुनू नेता बीच असाधारण रूप सँ तीखी बातचीत भेल।

रिपोर्टमे अमेरिकी अधिकारीसभ आ सूत्रसभक हवाला सँ दावा कयल गेल अछि जे राष्ट्रपति ट्रंप लेबनानमे इजरायली सैन्य कार्रवाई सँ काफी नाराज छलाह। कहल जा रहल अछि जे बातचीतक दौरान ट्रंप नेतन्याहूक रणनीति पर कड़ा आपत्ति जतौलनि आ क्षेत्रीय स्थिति केँ अनावश्यक रूप सँ जटिल बनेबाक आरोप सेहो लगौलनि।

लेबनानमे सैन्य अभियान बनल विवादक मुख्य कारण

जानकारीक अनुसार, विवाद ओ समय बढ़ि गेल जखन इजरायलक प्रधानमंत्री नेतन्याहू आ रक्षा मंत्री इजरायल काट्ज़ लेबनानक राजधानी बेरूतक दाहिये क्षेत्रमे हिजबुल्लाहक नियंत्रण वाला इलाकामे हमला करबाक आदेश देलनि। इजरायलक पक्ष रहल जे हिजबुल्लाह लगातार संघर्ष विरामक उल्लंघन कऽ रहल अछि आ इजरायली क्षेत्र पर रॉकेट तथा ड्रोन हमला करैत रहल अछि।

एहि घटनाक बाद बेरूतक दक्षिणी क्षेत्रमे रहनिहार लोकसभमे भयक माहौल बनि गेल आ बहुत लोक संभावित हवाई हमलाक आशंकामे सुरक्षित स्थान दिस प्रस्थान करय लगलाह।

ईरानक चेतावनी, वार्ता पर पड़ि सकैत अछि असर

हिजबुल्लाहक प्रमुख समर्थक मानल जाए वाला ईरान चेतावनी देने अछि जे लेबनानमे लगातार बढ़ैत सैन्य तनाव अमेरिका आ ईरानक बीच चलि रहल कूटनीतिक वार्ताक प्रभावित कऽ सकैत अछि। ईरानी अधिकारीसभक अनुसार लेबनानमे संघर्ष विराम क्षेत्रीय स्थिरता लेल अत्यंत महत्वपूर्ण अछि।

अमेरिकी अधिकारीसभक कहब अछि जे ट्रंप इजरायलक सुरक्षा संबंधी चिंताक समझैत छथि, मुदा हुनकर मानब अछि जे वर्तमान संघर्ष अपेक्षाकृत बेसी बढ़ा देल गेल अछि। विशेष रूप सँ आम नागरिकक हताहत होएबाक घटनासभ अमेरिकी प्रशासनक चिंता बढ़ा रहल अछि।

बातचीतक बाद बदलल संकेत

रिपोर्टमे दावा कयल गेल अछि जे एहि बातचीतक बाद इजरायल बेरूतमे प्रस्तावित किछु सैन्य अभियान पर पुनर्विचार कयलक। ट्रंप बादमे सोशल मीडिया मंच Truth Social पर लिखलनि जे हुनकर प्रधानमंत्री “बीबी” नेतन्याहू संग सार्थक बातचीत भेल अछि आ बेरूत दिशामे कोनो अतिरिक्त सैन्य कार्रवाई नहि कयल जाएत।

ट्रंप ईहो दावा कयलनि जे मध्यस्थसभक माध्यम सँ हिजबुल्लाह द्वारा तनाव कम करबाक संकेत भेटल अछि। मुदा इजरायली नेतृत्व अपन आधिकारिक रुखमे कोनो बड़ा बदलावक घोषणा नहि कयलक।

नेतन्याहू कहलनि—स्थिति यथावत

वार्ताक बाद जारी बयानमे प्रधानमंत्री नेतन्याहू स्पष्ट कयलनि जे दक्षिणी लेबनानमे इजरायलक सैन्य अभियान जारी रहत। हुनका अनुसार यदि हिजबुल्लाह द्वारा इजरायल पर हमला जारी रहल तऽ बेरूत पर कार्रवाईक विकल्प खुलल रहत।

दुनू नेताक बीच बढ़ैत मतभेदक संकेत

राजनीतिक विश्लेषकसभक मानब अछि जे ई घटनाक्रम अमेरिका आ इजरायलक घनिष्ठ संबंधक बावजूद किछु रणनीतिक मुद्दासभ पर उभरैत मतभेदक संकेत दैत अछि। विशेष रूप सँ ईरान, लेबनान आ क्षेत्रीय सुरक्षा नीति पर दुनू देशक प्राथमिकतामे अंतर स्पष्ट देखाइ पड़ि रहल अछि।

विशेषज्ञसभक अनुसार मध्य पूर्वमे जारी तनाव आगामी समयमे वैश्विक राजनीति आ सुरक्षा व्यवस्था पर गहरा प्रभाव छोड़ि सकैत अछि, आ अमेरिका-इजरायल संबंध पर सेहो दुनियाक नजर बनल रहत।