गोल्ड क्लास सीट, विविध मेन्यू आ सीट पर सेवाक संग भेटत प्रीमियम रेस्टो-सिनेमा अनुभव

नई दिल्ली। वेव ग्रुप यूनिटी वन मॉल, जनकपुरीमे वेव सिनेमाजक भव्य उद्घाटनक घोषणा कयलक। एहि नव मल्टीप्लेक्समे दू टा स्क्रीन आ कुल 116 गोल्ड क्लास सीट अछि। एतय दर्शक एक्के ठाम शानदार मनोरंजन, बेहतरीन खानपान आ प्रीमियम मेहमाननवाजीक अनुभव ले सकताह।

एहि अवसर पर वेव ग्रुपक मैनेजिंग डायरेक्टर श्री राजीव गुप्ता कहलनि जे आब सिनेमा देखबाक अनुभव खाली पैघ स्क्रीन तक सीमित नहि रहल। दर्शक मनोरंजनक संग आराम आ बेहतरीन खानपानक संयोजन पसिन्न कऽ रहल छथि। वेव सिनेमाज, जनकपुरी एहि बदलैत पसंद केँ ध्यानमे रखैत रेस्टो-सिनेमा अवधारणा प्रस्तुत कयलक अछि।

ओ कहलनि जे एहि मल्टीप्लेक्समे दू टा स्क्रीन, 116 गोल्ड क्लास सीट, सीट पर भोजन आ सेवाक सुविधा, विविध मेन्यू आ रेस्टोरेंट जेकाँ लॉबीक व्यवस्था अछि। कंपनीक उद्देश्य फिल्म, मेहमाननवाजी आ खानपान केँ मिला कऽ दर्शक सभकेँ एकटा संपूर्ण मनोरंजन अनुभव देब अछि।

वेव सिनेमाज, जनकपुरीमे अत्याधुनिक प्रोजेक्शन आ साउंड सिस्टम लगाओल गेल अछि। दर्शक अपन सीट पर बैसले भोजन आ पेय पदार्थ मंगा सकैत छथि। एहि सुविधासभक माध्यमे कंपनी सिनेमा देखबाक अनुभवकेँ बेसी आरामदायक आ खास बनेबाक प्रयास कयने अछि।

वेव सिनेमाजक डायरेक्टर श्री योगेश रायजादा कहलनि जे जनकपुरीमे एहि सिनेमा घरक शुरुआत उपभोक्ताक बदलैत पसंदकेँ दर्शबैत अछि। मनोरंजन, आराम आ भोजनक माध्यमे लोकसभकेँ एक ठाम आनब एहि पहल केर मुख्य उद्देश्य अछि। ओ कहलनि जे प्रत्येक नव शुरुआतक संग कंपनी दर्शकसभकेँ अलग अनुभव देबाक आ क्षेत्रमे सिनेमा संस्कृतिकेँ नव रूप देबाक प्रयास करैत अछि।

यूनिटी वन मॉलक ग्राउंड फ्लोर पर स्थित एहि मल्टीप्लेक्सक स्लोगन अछि— “बिगर स्टोरीज, ब्राइटर टुगेदर”, अर्थात् पैघ कहानियां, संग रहला पर बेसी नीक अनुभव। एहि अवधारणाक माध्यमे दिल्लीक दर्शक फिल्म, स्वादिष्ट भोजन आ मित्र-परिवारक संग मनोरंजनक नव अंदाजक अनुभव कऽ सकताह।

देशभरिमे विस्तारक योजना

उत्तर भारतक प्रमुख सिनेमा चेनसभमे शामिल वेव सिनेमाज 2003 मे नोएडामे अपन पहिल मल्टीप्लेक्सक संग एहि कारोबारमे प्रवेश कयने छल। कंपनीक प्रेस विज्ञप्तिक अनुसार, ब्रांड अपन कारोबारक विस्तार कऽ रहल अछि आ अगिला साल तक 20 अतिरिक्त स्क्रीन तथा करीब 4,000 सँ 5,000 अतिरिक्त सीट जोड़बाक योजना बना रहल अछि।

कंपनी गुरुग्राममे 5 स्क्रीन, राज नगर एक्सटेंशनमे 5 स्क्रीन आ नोएडा एक्सटेंशनमे 4 स्क्रीन वाला परियोजनासभ पर काज कऽ रहल अछि। एहि विस्तारक उद्देश्य देशक प्रमुख बाजारसभमे अपन उपस्थिति मजबूत करब आ भारतभरिमे दर्शकसभ तक पहुँच बढ़ायब अछि।

जनकपुरीमे नव मल्टीप्लेक्सक शुरुआत प्रीमियम सिनेमा आ रेस्टोरेंट-शैलीक मेहमाननवाजीक संयोजन प्रस्तुत करैत अछि। एहि पहलसँ दिल्लीक दर्शकसभकेँ फिल्म देखबाक संग खानपान आ आरामक एकीकृत अनुभव भेटबाक उम्मीद अछि।