नई दिल्ली। उत्तरी दिल्लीमे 90 लाखसँ बेसी लोककेँ बिजली आपूर्ति करयवला प्रमुख बिजली वितरण कंपनी टाटा पावर-दिल्ली डिस्ट्रिब्यूशन लिमिटेड (टाटा पावर-डीडीएल) दिल्लीक नागरिक आ रामलीला समितिसभसँ दशहराक उत्सव सावधानीपूर्वक मनयबाक अपील कयने अछि। कंपनी लोकसभसँ आग्रह कयने अछि जे बिजलीक उपकरण, इंस्टॉलेशन आ ऊपरसँ गुजरयवला बिजलीक तारक लग रावण, कुंभकर्ण आ मेघनाथक पुतला नहि जराबथि। कंपनीक कहब अछि जे सुरक्षित उत्सव मनयबाक लेल सावधानी बरब आवश्यक अछि।
टाटा पावर-डीडीएलक एहि जागरूकता अभियानक उद्देश्य पर्व-त्योहारक समय असुरक्षित गतिविधिसँ उत्पन्न भऽ सकयवला खतरा सभकेँ रोकब अछि। बिजलीक तारक लग पुतला जरयलासँ आगि लगबाक, बिजली आपूर्ति बाधित होयबाक आ आवश्यक सेवासभ प्रभावित होयबाक आशंका रहैत अछि। एहि कारण कंपनी लोकसभसँ सुरक्षा दिशानिर्देशसभक पालन करबाक अपील कयने अछि, जाहिसँ उत्सव सुरक्षित आ दुर्घटनामुक्त रहय।
डिस्कॉम अपन ग्राहक आ जमीनी स्तर पर काज करयवला कर्मचारिसभक लेल सेहो व्यापक सुरक्षा जागरूकता अभियान चला रहल अछि। एकर उद्देश्य पर्व-त्योहारक मौसममे बिजलीसँ जुड़ल दुर्घटनाक जोखिम कम करब अछि।
बिजली सुरक्षाक लेल ग्राहकसभ लेल जरूरी सुझाव
टाटा पावर-डीडीएल ग्राहकसभसँ निम्नलिखित सावधानी बरतबाक अपील कयने अछि—
- बिजलीक इंस्टॉलेशन आ ऊपरसँ गुजरयवला बिजलीक तारक लग पुतला नहि जराउ, जाहिसँ करंट लगबाक खतरा नहि रहय।
- उत्सवक दौरान ट्रांसफॉर्मर आ बिजलीक तारसँ सुरक्षित दूरी बनौने राखू।
- पंडाल सजबैत समय लोहेक खंभा आ अन्य धातुयुक्त सामग्रीक उपयोग बिजलीक खुलल तारसँ सुरक्षित दूरी पर करू।
- पटाखा आ अन्य गतिविधि बिजलीक तारसँ दूर राखू।
- सजावटी लाइटकेँ लोहा वा अन्य धातुसँ बनल खंभा आ रेलिंगक संपर्कमे नहि आबय दिअ।
- घरमे आरसीसीबी (RCCB) लगाउ। ई बिजलीक लीकेजसँ होयवला करंटक जोखिम कम करय आ आगि लगबाक आशंका घटाबयमे मदद करैत अछि।
- बिजलीक लाइट लगयबाक लेल योग्य इलेक्ट्रिशियनक सहायता लिअ।
- ज्वलनशील सामग्रीक लग दीप वा मोमबत्ती नहि जराउ।
- उच्च गुणवत्ता बला वायरिंग आ लाइटक उपयोग करू। बिजली बचाबय लेल एलईडी लाइट चुनू।
- कोनो सामान टांगबाक लेल सबस्टेशनक देवाल वा बिजलीक खंभाक उपयोग नहि करू।
1.05 लाखसँ बेसी बिजली इंस्टॉलेशनक निरीक्षण
सुरक्षित आ दुर्घटनामुक्त पर्व-त्योहार सुनिश्चित करबाक लेल टाटा पावर-डीडीएल अपन वितरण नेटवर्कमे व्यापक सुरक्षा निरीक्षण अभियान सेहो चलौने अछि। एहि अभियानक अंतर्गत 1.05 लाखसँ बेसी इंस्टॉलेशनक निरीक्षण कयल गेल।
निरीक्षणमे प्लेन सीमेंट कंक्रीट (पीसीसी) पोल, स्ट्रीट लाइट, खुलल तार, टावर, रेल खंभा, सबस्टेशनक घेराबंदी, फीडर आ सर्विस पिलर, पीडब्ल्यूडी आ एमसीडीक खंभा, एटीएम आ पार्कमे लागल लाइट सहित विभिन्न विद्युत संरचनाकेँ शामिल कयल गेल। एहि क्रममे सुरक्षासँ जुड़ल संभावित खतराक पहचान कयल गेल आ आवश्यक सुधारात्मक कदम उठाओल गेल।
कंपनीक ऑपरेशन आ मेंटेनेंस टीम पर्व-त्योहारक पूरा मौसममे सतर्क रहत आ सुरक्षा संबंधी समस्या सामने अयलापर ओकर शीघ्र समाधान करबाक लेल तैयार रहत। डिस्कॉम ग्राहकसभसँ सेहो आग्रह कयने अछि जे ओ सतर्क रहथि आ सुरक्षा दिशानिर्देशसभक पालन करथि, जाहिसँ अपना आ अपन परिवारकेँ बिजलीसँ जुड़ल खतरासँ बचा सकथि।
सार्वजनिक स्थान पर रोशनी आ सुरक्षा पर जोर
टाटा पावर-डीडीएल पर्व-त्योहारक समय सार्वजनिक स्थान आ सड़कसभ पर पर्याप्त रोशनी सुनिश्चित करबाक पर विशेष ध्यान दऽ रहल अछि। एहि उद्देश्यसँ कंपनी अपन परिचालन क्षेत्रमे स्ट्रीट लाइट आ हाई-मास्ट लाइटक व्यापक रखरखाव काज कय रहल अछि।
एकर अतिरिक्त, कस्टमर केयर सेंटर आ ग्राहक संपर्कक विभिन्न माध्यमसँ जागरूकता अभियान चलाओल जा रहल अछि। एहि अभियानक माध्यमसँ घर आ अस्थायी विद्युत व्यवस्था मे ईएलसीबी (ELCB) वा आरसीसीबी (RCCB) लगयबाक आ ओकर उचित उपयोग करबाक लेल प्रोत्साहित कयल जा रहल अछि।
एहि प्रयाससभक उद्देश्य बिजलीक झटकाक जोखिम कम करब, करंट वा विद्युत गड़बड़ीक कारण आगि लगबाक घटनासभकेँ रोकब आ सुरक्षित तरीका सँ पर्व-त्योहार मनयबाक वातावरण तैयार करब अछि।
टाटा पावर-डीडीएल स्पष्ट कयने अछि जे कोनो असुरक्षित स्थिति वा अप्रिय घटनाक जानकारी ग्राहक कंपनीक 24 घंटा उपलब्ध टोल-फ्री हेल्पलाइन 19124 पर दऽ सकैत छथि।