नई दिल्ली। राष्ट्रपति भवन सांस्कृतिक केन्द्रमे बृहस्पतिदिन आयोजित एक विशेष कार्यक्रममे बस्तर संभागक प्रतिनिधिमंडलक भारतक राष्ट्रपति श्रीमती द्रौपदी मुर्मुसँ भेंट भेल। प्रतिनिधिमंडलमे बस्तर पंडुम-2026 केर विजेतासभ, बस्तरक परगना मांझी, चालकी आ अनेको जनजातीय प्रतिनिधि शामिल छलाह। एहि अवसर पर केन्द्रीय गृह एवं सहकारिता मंत्री अमित शाह, छत्तीसगढ़क मुख्यमंत्री विष्णु देव साय तथा आन गणमान्य व्यक्तिसभ सेहो उपस्थित छलाह।

एहि अवसर पर राष्ट्रपति द्रौपदी मुर्मु कहलनि जे बस्तर पंडुम केवल एकटा सांस्कृतिक कार्यक्रम नहि, बल्कि बस्तरक गौरवशाली परंपरा, सांस्कृतिक पहचान आ जनजातीय धरोहरक उत्सव अछि। हुनकर कहब छल जे एहि आयोजनक उद्देश्य राष्ट्रीय आ अंतरराष्ट्रीय स्तर पर बस्तरक वास्तविक पहचान स्थापित करब अछि।

राष्ट्रपति कहलनि जे बस्तर पंडुम जेकाँ आयोजन युवापीढ़ीकेँ अपन परंपरा, रीति-रिवाज आ सांस्कृतिक धरोहरसँ जोड़बाक महत्वपूर्ण माध्यम बनि रहल अछि। एहन आयोजन पर्यटनकेँ बढ़ावा दैत अछि आ स्थानीय स्तर पर रोजगारक नव अवसर सेहो सृजित करैत अछि।

हुनका बस्तरक सामाजिक व्यवस्थामे मांझी आ चालकी केर भूमिकाक प्रशंसा करैत कहलनि जे ओ सभ समाज आ प्रशासनक बीच मजबूत सेतुक काज करैत छथि। हुनका विश्वास व्यक्त कएलनि जे हुनक नेतृत्व आ समर्पणसँ क्षेत्रमे शांति, सामाजिक समरसता आ विकासकेँ आरो बल भेटत।

राष्ट्रपति कहलनि जे सरकारक प्रयास आ स्थानीय लोकसभक सक्रिय सहभागिताक कारण आइ बस्तर विकासक नव राह पर अग्रसर अछि। लोक हिंसाक वातावरणसँ बाहर निकलि शिक्षा, रोजगार आ विकासक अवसरसँ जुड़ि रहल छथि। दूर-दराजक गामसभ धरि सड़क, बिजली आ पेयजल जेकाँ मूलभूत सुविधा पहुँचि रहल अछि। बहुत दिनसँ बंद पड़ल विद्यालयसभमे फेर बच्चासभक चहल-पहल लौटि आएल अछि। हुनकर कहब छल जे आइ बस्तरमे आशा, विश्वास आ प्रगतिक नव वातावरण बनल अछि, जे सम्पूर्ण देश लेल गर्वक विषय अछि।

राष्ट्रपति जनजातीय युवासभक प्रतिभाक सेहो सराहना कएलनि। हुनका कहब छल जे ओ शिक्षा, विज्ञान, कला आ खेलक क्षेत्रमे उत्कृष्ट प्रदर्शन कऽ रहल छथि। जनजातीय समाजमे खेल आ कलाक नैसर्गिक प्रतिभा होइत अछि। हालहि मे आयोजित बस्तर ओलंपिक केर उल्लेख करैत हुनका एकरा युवासभक प्रतिभाकेँ मंच देबाक महत्वपूर्ण प्रयास बतौलनि।

हुनका विश्वास जतौलनि जे जनजातीय समाज अपन सांस्कृतिक पहचानकेँ सुरक्षित रखैत विकास यात्रामे सक्रिय सहभागिता करैत राष्ट्र-निर्माणमे महत्वपूर्ण योगदान देत। संगहि सहयोग आ सद्भावक संस्कृतिकेँ मजबूत करबाक, महिला, बच्चा, वरिष्ठ नागरिक तथा वंचित वर्गक सशक्तीकरण आ जल, पर्यावरण तथा प्राकृतिक संसाधनक संरक्षणकेँ जनआन्दोलन बनेबाक आह्वान सेहो कएलनि।

एहि अवसर पर केन्द्रीय गृह एवं सहकारिता मंत्री अमित शाह राष्ट्रपति श्रीमती द्रौपदी मुर्मुक संग बस्तरक मांझी-चालकी आ बस्तर पंडुमक विजेतासभसँ संवाद कएलनि। बादमे सोशल मीडिया मंच एक्स पर साझा कएल गेल अपन संदेशमे अमित शाह कहलनि जे राष्ट्रपति भवनमे पहिल बेर बस्तरक पारंपरिक वेशभूषामे पहुँचल बस्तरवासी एहि बातक प्रमाण छथि जे जे बस्तर एक समय नक्सली हिंसाक कारण अपन समृद्ध संस्कृति आ धरोहर गँबा रहल छल, ओ आइ नक्सलमुक्त भऽ अपन विरासतकेँ फेर सँ सहेजि रहल अछि।

हुनका कहब छल जे विकासक पथ पर तेजीसँ आगाँ बढ़ैत बस्तर आगामी वर्षसभमे छत्तीसगढ़क सभसँ विकसित संभाग बनि विकासक नव कीर्तिमान स्थापित करत। अमित शाह एहि परिवर्तनकेँ बस्तरमे शांति, सुरक्षा आ विकासक दिशामे भऽ रहल व्यापक बदलावक प्रतीक बतौलनि।