नई दिल्ली। संसदक मानसून सत्रक पहिल दिन कॉकरोच जनता पार्टी (CJP) द्वारा प्रस्तावित ‘संसद चलू’ मार्च केँ लऽ सोमदिन भोरे राष्ट्रीय राजधानी दिल्लीमे सुरक्षा व्यवस्थाकेँ अभूतपूर्व रूप सँ कड़ा कऽ देल गेल। जंतर-मंतर सँ संसद दिस मार्च करबाक प्रयास कऽ रहल प्रदर्शनकारीसभ केँ दिल्ली पुलिस आगाँ बढ़बासँ रोकि देलक। एहि दौरान प्रदर्शनकारी आ पुलिसक बीच धक्का-मुक्की भेल, जाहि बाद स्थिति नियंत्रित करबाक लेल पुलिस लाठीचार्ज कएलक।

CJP सोमदिन भोरे 9 बजे जंतर-मंतर सँ संसद धरि मार्च निकालबाक आह्वान कएने छल, जबकि संसदक मानसून सत्र 11 बजे सँ शुरू होबए बला छल। एहिकेँ ध्यानमे रखैत दिल्ली पुलिस संसद भवन आ ओकर आसपासक सम्पूर्ण वीआईपी क्षेत्र केँ कड़ा सुरक्षा घेरामे बदलि देलक।

स्थिति केँ देखते दिल्ली पुलिस भारतीय नागरिक सुरक्षा संहिता (BNSS) केर धारा 163 केर तहत निषेधाज्ञा लागू कएने अछि। पुलिसक अनुसार कानून-व्यवस्था बनाए रखबाक आ कोनो अप्रिय घटनाक रोकथाम लेल अतिरिक्त पुलिस बल आ सुरक्षा कर्मीसभक तैनाती कएल गेल अछि। संसद मार्ग, विजय चौक आ अन्य संवेदनशील इलाकामे बैरिकेडिंग कऽ आवाजाही पर कड़ी नजर राखल जा रहल अछि।

एहि बीच दिल्ली मेट्रो रेल कॉरपोरेशन (DMRC) सुरक्षा कारणक हवाला दैत संसद क्षेत्र सँ जुड़ल पाँच प्रमुख मेट्रो स्टेशन केँ अगिला आदेश धरि अस्थायी रूप सँ बंद कऽ देलक। DMRC यात्रुसभ सँ वैकल्पिक मार्ग अपनाबय लेल अपील कएने अछि।

बंद कएल गेल मेट्रो स्टेशन

सुरक्षा एजेंसीसभक निर्देश पर निम्नलिखित पाँच मेट्रो स्टेशन अगिला आदेश धरि पूर्ण रूप सँ बंद राखल गेल अछि—

• राजीव चौक (Rajiv Chowk)
• केंद्रीय सचिवालय (Central Secretariat)
• पटेल चौक (Patel Chowk)
• जनपथ (Janpath)
• सेवा तीर्थ (Sewa Tirth)

एहि स्टेशनसभ पर ने यात्रीसभ केँ प्रवेशक अनुमति देल जा रहल अछि आ ने ट्रेनसभ ओतय रुकि रहल अछि। राजीव चौक आ केंद्रीय सचिवालय जकाँ प्रमुख इंटरचेंज स्टेशन बंद होयबाक कारण दिल्ली-एनसीआरक लाखों दैनिक यात्रीसभ केँ भारी असुविधाक सामना करय पड़ि रहल अछि।

CJP केर कहब अछि जे ओकर विरोध प्रदर्शन देशक शिक्षा क्षेत्रमे सुधार आ कथित अनियमितताक विरोधमे आयोजित कएल जा रहल अछि। पार्टी संसदक मानसून सत्रक पहिल दिन ‘संसद चलू’ मार्चक माध्यम सँ अपन मांग सरकार धरि पहुँचेबाक प्रयास कऽ रहल अछि।

दोसर दिस, दिल्ली पुलिस आ सुरक्षा एजेंसीसभक कहब अछि जे एहि मार्च लेल आयोजकसभ पूर्व अनुमति नहि लेने छल। संसद जेकाँ अति संवेदनशील आ उच्च सुरक्षा क्षेत्रमे कोनो अनधिकृत प्रवेश अथवा अव्यवस्था रोकबाक लेल व्यापक सुरक्षा व्यवस्था कएल गेल अछि। संसद परिसर आ आसपासक इलाकामे भारी संख्या मे पुलिस, अर्द्धसैनिक बल आ अन्य सुरक्षा कर्मीसभ तैनात कएल गेल छथि।

पुलिसक अनुसार राजधानीमे कानून-व्यवस्था बनाए रखब सर्वोच्च प्राथमिकता अछि आ कोनो तरहक स्थिति सँ निपटबाक लेल सभ आवश्यक कदम उठाओल गेल अछि।